وحشتينى يا أمى

وحشتينى يا أمى
صوتك يا أمى...
بيونسنى فى حلم جميل
لسه بيجينى صداه..
ساعة الصبحيه
و انتى بتشربى شايك مع أبويا

و ساعات بأسمع صوت مفتاحك
فى الباب الساعة اتنين...
وقت رجوعك مالشغل
و فى قلبك بيت ليا

أمى....واحشانى...
النومة فى حضنك الدافى
و القعده فى قلبك الصافى
و أنا بأسكر فى حنانك... و أدفى بحنيتك
و بأسلم للكون بيقين فى دعاكى ليا

وحشتنى مسحة ايدك على راسى
و صوابعك...."صوابع زينب"
و هى بتشيل حزن الدمعه من نن عينيه

و حضنى دايما ناقصه حنان.......من غيرك
و قلبى شايل قلبك جواه..
وعايش دقاته و دقاتك
قلبك بيغنى فى قلبى..
و روحى ساكنة فى عنوان روحك
عايشة على نورك....تِسلم روحك

و بيتهيالى باسمع...
صوت حبرك على ورقك
و انتِ بتكتبى ساعة العصريه
صوتك..لسه بيحمينى
و انتى بتقرى القرآن ساعة الفجرية

بأقرالك سورة الرحمن
و بأروحلك أربعة أشلاء عابدين
و اتمشالك عالكورنيش
وعلى بحرك يا اسكندريه
ريحة العطارة فى الغورية
والرز أبو عسل اسود
و كشك صعيدى و عسليه
ألف لون لألف ذكرى
بتوحشينى فيهم بفطرة
فى دقة زايدة فى قلبى ليكى
بتفكرنى بكل شئ غويتى
و أنا كل غيتى ترضى عليا

و بأسجد كام سجده فى حبك
على صوت شقشقة العصافير
وواحشنى كلامك ويايا
و كان ودى أعرف رأيك فى ضنايا و هنايا
و فى كل اللى بيحصل فيا

واحشانى....يا أمى
و أنا دنيا لآخرة..رضاكى أنا غيره ماليش
ومهما سجدت فى شكر الله
ولا هأكفيك طلقه من حقك
و لا هأوفى نعمة الله بيكى عليا