الأربعاء

على حطة ايدك

على حطة ايدك ..القهوة نشفت في فناجين الصبحية..واعقاب السجاير لسه معلم عليها شفايفها..اشعة الشمس لسه بتتسحب وتدفي الكرسي اللي جنب المكتبة..وكتاب أمها مفتوح على نفس الصفحة..حواديت صاحبتها..ودردشة لغاية الصبح..لسه حروفها متنطورة ع الحيطان والسقف..وورق.. ياما هنا ياما هناك..مليان أحلام..ايشي قصيدة وايشي قصة وايشي رسمة .. وايشي هتافات .. صوتها لسه واصل للجيران ... كان كل حلم منهم وراه حياة

اخر ما زهقت زرعت صبار..وهى بتشتريه قالت في سرها..اهو بيعيش مهما قسيت عليه الحياة..وهى مروحة لقت عم فرج بتاع المفاتيح سايب لها يافطة صغيرة مع عم سعيد البواب مكتوب عليها..الصبر..قالت في عقل بالها..مابدهاش..الصبر مفتاح الفرج واللي يصبر ينول..ومع تنهيدة اخرها دعوة تتسحب وتطلع بصوت عالي ..قالت ... يااا رب..

وعلى حطة ايدك..الصبارة على رف الشباك..واليافطة يادوب على بعد شبرين..متعلقه جنبها ع الحيطة .. جنبيهم صور الاصحاب والجدات.. والاوقات ..اللي بتنباس م القلب كل ما تلمحها ف الذاكرة..

كانت بتحب وقت العصاري..قال ايه ملايكة النهار بيسلموا المناوبة لملايكة الليل..والدنيا لا صيف ولا شتا ..والشمس عملت الواجب ودفت الهوى .. والعصافير..راجعه بيوتها في احضان الشجر .. وعاملين مظاهرة زقزقة ....

وعلى حطة ايدك .. راديو ستها القديم داير على اذاعة الاغاني..والفنجان ف المطبخ مستني الكنكة اللي يادوب كانت قايمة تحطها ع النار..وكتاب مفتوح مكفي على وشه..وسيجارة اتحرقت م الانتظار..نسيتها لما جالها مكالمة من صاحبتها..ونزلوا يزقزقوا مع بقية العصافير..دلوقتي عم فرج معلق صورتها ف الدكان وتحتها يافطة مكتوب عليها مكتوب "صبر الشهيد نَصَر البلاد" ...

الخميس

فقدان الذاكره

طبيعي ان الناس متردش عليك .. ما إنتا مجنون
دايما عندك إحساس ان الناس نظرها بيضعف لما بتيجي تشوفك
بالرغم من اعتراف رسمي للأحلام انها تعرفك شخصيا .. بالاسم والعنوان
مش قولتلك .. التاريخ بيخض
الماضي اتجسد قدام حبابي عينيك ..
هربت منه ليه ..
دقات الساعه وقفتلك تعظيم سلام علشان تعدي لبر الأمان ..
مستني ايه؟

- مش عارف

يبقي لازم تعرف
ان الوحده بتجلب أحزان
والأحزان مخاويه دموع
ودموعك كما ريم الموج
وجراحك كل ما تخمد
تولدلك هم وأوهام
لساك بتدور علي حواديت قبل النوم .. تجعلك بوسطجي بمراسيل لناس غاوي تقابلها في أحلام اليقظه خيالات ..

- ما هو أصل .. العصفور كان حزنان .. جناحات منكسره .. غناويه فيها بحه .. اكمن لونه مختلف عن بقية العصافير .. شفاف .. مليان نور بيشع من قلبه الأخضر .. ويملا الدنيا كلها .. دايما يقف علي شجرة كل فرع منها بألف لون .. وبرغم كل ده .. الناس كانت بتخاف تشوفه .. أصل عينيه يا سيدي ..

مالها؟

-تسحبك جواه
كان بيصدق كل عينين يلقاها .. ويحط كلامها في جدره .. مع الوقت .. لقي نفسه عبيط

مال العصافير بكلامك؟ ... ده توهان

- أو زوغان ..
كل الحواديت في دماغي تزوغ ..
بس اللي مجنني .. انه مابيفضلشي غير الراجل أبو نضارات

مين ده راخر؟

- راجل عجوز أسمر عينيه ماضي مرغرغ بحنين بيفيض من قلبي لدنياه .. ماسك سيجاره تقدر تشوف في دخانها كل مشاهد زمان بتتحرك بالألوان .. وعينيه زي النور اللي بيبربش من ورا شيش الجيران .. شويه تلقي البهجة بتحضنك جواها .. شويه تتملي شجن .. شويه وكأنها ازاز بيلمع .. وشويه تحس ان المشاهد اللي دايره جواه زي ما تكون .. بتخوفه .. طلتها عليه .. بتفكره .. بألم الفراق اللي بيحاول ينسي انه مافارقوش

انتا ايه حكايتك؟

- أنا تعبان جدا .. عاوز أنام
في حضن وطن مرتاح
تحت شجرة أزلية بتطرح عمري ضل وأفراح

اتفضل .. ممكن ترتاح
... لو فقدت الذاكره

- ذاكرة الواقع ولا الخيال؟

لزما ولابد راح تنتهي الأحزان

- روحي بتروح جواه
وبأتوه في أنوار بتقيد في بيوت
مالهاش أي وجود علي أرض الواقع
أنا بأتجنن من صوته الرنان
سيادته قاعد يتكلم جوايا
وأنا نفسي أتكلم وياه
بس .. مش لاقيه
وكل ما أقرب منه أتشاهد
..مش عارف .. دلوقتي ايه مطلوب؟

حالة هروب في النوم
خروج من الأحلام
إغرق في زحام غريب
الماضي فيه مجهول

-أنا مش مجنون علي فكره .. بس الناس هي اللي فاكره اني عاقل
الحمامه اللي في الجنينه .. صحتني وهي بتبني عشه جديده .. بصتلي وقالت (ساعدني) .. وبعد ما بنينا العشه سوا .. عزمتني علي قهوه سكر زيادة .. قالت .. (بأعملها للقلب اللي حزنه فوق العاده)

واضح انك بتخرف!

-شئ كده مش مفهوم .. أو مفهوم
لكن يفضل جواك محبوس .. في عالم افتراضي .. موجود .. ومش موجود

تقصد الضمير الغائب؟

-أنا ميت جناح مكسور .. وأعيش في سرك نور .. من فوق بساط الريح .. أدوب في سرب حمام .. في هجرة التكوين .. من فوق سطوح البيت .. لجزيرة في الأرياف .. فوقها قمر سهران .. وافضل كطير مدبوح .. ولا حد بيا يبوح .. بيت بلا عنوان .. مستني ذكري تعود .. تنور الأيام

الاثنين

قيمة البكا

...قررت أقابلك

متسألنيش فين..

مطرح ما تكون...هأكون

ممكن تستناني لو اتأخرت؟

بس هأجيلك..

عند اخر بيت في القصيده الجايه

أو بيت متوارب بابه في 4 أشلاء عابدين

ساعة خروج صلاة الفجر لعربية عم حسن بتاع الكسكسي السخن في السيده زينب ... لحظتها .. بينزل سرب حمام علي سطوح بيت في القلعه ... والدمعه تفر وتبل رموش الست اللي واقفه تبيع مناديل عند إشارة مرور في تقاطع الجمهورية مع قصر النيل ... وقتها هتلاقي حوريه..يادوب خلصت صلاه وبتسَقع القلل علي سور بلكونتها في باب الشعريه

شَعرِك شاب يا حوريه..والتجاعيد اللي ف وشك بتفكرني بيوم ما قابلناكي وانتي نازله من أتوبيس المدرسه..وعينيكي اتنهدت حزن شقيان..وقُلتي: الزمن غَلاب

إنت معايا!ا-

فاكر ريحة التقلية بتاعت خالتو منيره..شبه تقلية خالتك..والسجاير وأمطة الشَعر والكنبه العاليه والراديو الترانزستور....بالظبط

فاكر قهوة عم نجيب في شارع شامبليون..هي نفس القهوه اللي مريت عليها وكتبت القصيده ديه

فاكر لما القمر وقف يعاكسنا من البلكونه ويضَوي علي وشي وانت تقولي..لازم أبوس القمر

شقاوتك كانت بتضحكني

طب فاكر وقفتنا علي طابور السمك المقلي في سيدي بشر

ولا الشاي من ايد ستك ثومة جنب الشباك الأرابيسك...والست تقول وأنا وانت نعيد: الله محبه...الخير محبه

كنت غاوي تشرحلي وجهة نظرك والفرق ما بين ثومه والعدرا

فاكر تذاكر الحفلة اللي رَجَعتنا لبعض

والمشوار اللي قَطعناه علشان نوَصل واحد مانعرفهوش

طيب فاكر أول مره غنينا فيها مع بعض لفيروز

فاكر أول مره عنيه تيجي في عينيك

ساعتها اتكسفت...ماقدرتش أرفع عيني من ع الأرض

عمري ما شوفت عينيك بوضوح قد اليوم ده...

وكلامك كان واضح فيهم زي الشمس

مُصر تكمل القصيده

كَمل

أهي كلها أوهام...

زي حبات سكر دايبة في توليفة الكحه بتاعت ستو عزيزه

....فاكر يوم عزاها

أخدتني بالحضن وبقت الدنيا سكوت

مارتحناش الا اما عيطنا في حُضن بعض

دلوقتي..لا أنا ولا انت ببال مرتاح

صحيح....اوض الذكريات براح

-فاكرني؟

دايما غاوي تحُطني في مكان متلخبط

ليه مش ع الباب بتخَبَط...

-تخيل...

الناس ولا خدت بالها من حرقة قلبي عليك

رغم ان الدخان كان مالي البيت يوم ما نسيت الزيت ع النار

ولا حتي انت...

قررت تسيبني وتمشي

قررت تحُطني في مكان مش قيمتي

وفي نفس الوقت قررت تقولي بأحبك

اديني عقلك أو خُد قلبي

يمكن واحد فينا يقدر يبكي

الصوت

أبداً...إمبارح يا ستي

سمعت صوت مفتاحك في الباب وقت رجوعك م الشغل

والفجر...سمعت صوت همهاتك ع السبحة

الله أكبر...ولله الحمد

أصوات تجعل الدموع متحشرجة في سقف الحلق

وتخليني أروح في النور

وأدق مزاهر وطبول

بتعلمني أسكر من شوقك من غير ما أفوق

وأصغر قبل ما أعجز

وأتوضي بنظرة عينك

وأتعلم

أسكت وأنا أفكاري بتتكلم

عارفة إكتشفت إيه؟

الصمت موجع

لما يكون مليان مشاعر بتفضفض

وإتعلمت أتحول...

إلي شقشقات النور

مع طلعة الفجر وغنا العصفور

وكلام ويا القمر مرسوم

ومرجيحة الجنينة تدور

قعدة بلكونة تدندن

مع خالي حسين وهو بيضرب عود

وجونلة حمرا حرير لبستيها في أول يوم العيد

وحليم بيغنيلك موعود

أصبحت برج حمام مشروخ

لكن بيغني..غذبن عني

أنا بأتحول

وألقي الحياه بتتسحب مني

لذكريات عايشة في خيالي..وبتونسني

ساعة ما أعيشها

وساعة ما أدور..ولا ألقاش

في سرسبة الزمن تنهيدة

تسافر لأماكن بعيده

في عقد وخرزه زرقه متعلقه علي التسريحه

وصوره ليكي بتبصلي من تحت إزاز الشوفنيرة

وسورة الرحمن اللي بتحبيها

و أفضل كده...

وكأني شمس بتبوس الخد

موج شايل مراكب بحر

طياره ورق تايهه بين السحاب والسحر

تفتكري هأقدر علي كده كتير؟

كل ما أعوزك تحوليني إلي طفل رضيع

جناحات عاشقه تطير

لحب بلا وطن مسموح

ريقي نشف م الجوع

لحضنك السقا

إسقيني ولو حبة

من راحة البوح

..فضفضة روح

أُمري الزمن يسمحلي

أملى الدنيا أحضان

وأنفض من عينيه دموع

أصداء زمان دايره

ما يبقي فيها غير صوتك

وصوتي وهو بيقولك

..يا أمي

حواديت مسحورة

في أول الكراس رسمه

وفي أول القصيدة عنواني

...فكرة

أنا بجناحي أطير

وانت ان عايز تبقي أمير

أقدر أخبيك من خوفك

وأخبيك في النوم أحلام

و أحطك جوا الأساطير

عباد للشمس واقف علي ضفة نيل

أو طفل بيلعب بكفوفي

أغزل منك صوفي

و تخبيلي كسوفي

شال بيطيب روحي

عصفور ع الشجرة..واقف في الهوي بيصلي

نور أخضر علي سطح الموج بيضوي

ومراكب نايمة عروسة

حواديت مسحورة

وجواب تحت مفارش وردي

فوق في السحارة

و بيبان غير مطروقة

لخيالك متروكة

انتا واخدني معاك

و لا ناسيني هناك

في اللي خطر في خيالك

خطرك أوهام مغلوطة

وسلامك ويا أمانك..أمل..ونبوءة

تقدر تدي لنفسك حق يجوز

وتنام في حضني زي طفل عجوز

مش ع الحدود محجوز

وتعيش سهران مجذوب

عاشق..حيران

حالم في الصحيان

تقدر..

تطرح عمرك حضن يضمك

كفي قادر يسند كفك

و يعديه علي باب يفتحلك

لمكان عايش فيه بينك وما بين نفسك

ومكان ف خيالك كان مهجور

ارمي وداعك ورا ضهرك

ارمي شباكك لفراغ صبرك

ده القلب المفتون..بيثور

ويفور منه بخور و عطور

زي وليد مفطوم

بيصر يعيش..مش محروم

در بلمساتك نورها المسحور

اشرب منها بنظرات مخطوفة

ودوب

تخجل من غزلك..وتدوب..

بخريني بريحة الحنان في أنفاسك

حرريني....

بين ضلوعك وطن..دثريني

بخريني برقية الملايكه للنبي المحبوب

و احكيلي

عن دكه الفستان مع المكنه

و حكاية في تنوة القهوة

وتحكي.....

شئ فيك غاوي يندهني

و غاوي ياخدني علي مهلي

شئ فيك بيطيب الأشجان

و يزهر ف الهوي نعناع

شئ ما بينا يستاهل

ياخد غربة الأيام

شئ فيك بيتناسي

انه حقيقي حاسسني

و يسكت كل ما يشوفني

و يحكي معايا في بعدي

شئ فينا دايما بيوحشني

وانتا واخدني معاك

وانتا ناسيني هناك

السبت

أحلى ما فيك

و بطرف صباعك المس وش الميه..و سيب احساسك يرسم على وش العالم دواير نور..و سيبها تفور..و تدفى الأحضان و ترش بخور..صبرك عنوان للفرح و هتنول

و فى عز الضيق..اسحب نفسك بشطاره..و استأذن من ضيقك مشوار لآخر الحارة..قول له أصل أنا زهقان غاوى سلام و الدنيا ماشيه بقطاره..مش ناقص عطله و استسلام..أنا رايح أواجه بشجاعة

و اضحك لملايكه لسه بيبعتهم ربك..يرسمه بسمه على وشك..و انتا فى عز النوم

و امسح دمعك بايمان..بيقولك ان الدنيا يوم كشريه..و يوم سنيوره و يوم صعبه و مش مفهومة....و بدون أعذار..مطلوب منك تفضل أحلى ما فيك..علشان تفضل دنياك حلوة جوا عنيك..

و فى أقرب من طرفة عين..ربك راح يفرجها أكيد..علم قلبك يبقى بسيط..و خلى حمولك ع الرزاق..بضمير..رزقك عنك مش هيغيب

خارج نطاق الحدود

حدود الكون ستاير
زيح الستاره و اكشف المستور
افتح حدود الكون ..مد راسك بخفة و هدوء
و بخفة الظل عدى بروحك حدود
و استنشق من هوا الغيب و اللامعهود

حدود الكون بيبان
مين هناك؟
خارج حدود العاده و المألوف
و تيمة المعروف
و مشهد رومانسي زهق..فى الاعادة من ألوف
و النتيجة..انتحار حَبيب شنقاً من على كوبري قصر النيل..رغم الأُسوُد!

مين هناك؟
خارج سياق القدر و المكتوب...
خارج زحام الانتظار المشغول
خارج نطاق الخدمة الاجتماعية...
و الانتماء الى قضية سياسية...
و المسلسلات الدرامية
و الانتخابات و الافيشات...
و الاجتماعيات و الانسانيات..
و مين اللى عاش و مين اللى مات

مين هناك؟
مكتوب بالبونت العريض
..تفتكر انتا؟....حُر..مش سجين
خارج أسوار الكون الحديد
خارج روتين فطرة البنى آدميين
و محاولات للحرية..مضنية..انتا ليها أسير
و حوارات مالهاش مجالب لا من قريب و لا من بعيد

البس توب الجديد
مين هناك؟ بص شوف
و ان بصيت شمال يمين
جنوب و شرق أوسط ..مش سليم
تلقى الوجود استهلاكه أمر حتم..أصبح..مهين
مشهد الكون العظيم
و البشر آلات دايره بأنين
جوا دواير مفرغة...و الانتاج..نكسة..و صنع فى الصين..
فى صحوة الموت اليتيم
و كل لفة تزيد م الفراغ...سنين
فراغ..رغبة التغيير
فراغ...تملاه حدود..ترجع سجين
بين انشغال بالقضية
و بين هوية..
مثواها تراب يتبل بدموع صبى أو صبية
عصرية كانت أم مغربية

و الحياة..ما هى الا...هى...
فيلم يعرض على آلة سينمائية
جوا قوصة مونتاج سمائية
و النهاية..حتماً..تراجيدية
الا للى اتوضى لصلاة الحياة بروحانية

روح..اغسل خوفك بروح
عزمك لا يمكن يروح
اخلع هدمة المزعوم
اخلع حدودك الداخلية
عيش خارج مساكن تقليدية
و بتأني و صمود...
حاول تتوب...
عن عالم المشهور و المكرر المقهور
ممكن يكون..
اختيارك انك تعيش محدود
و بايدك يكون...
أجمل ما فى الكون خارج نطاق الحدود