دايما فى لحظة احراج زيادة فى الأسانسير
و الشوارع بأمشى فيها غريبة
و الناس من غير هوية
و أنا بطاقتى ضايعة من سنين
مطره نازلة ترخ
من وقع تكييف قديم
صوت الآدان فى الزحام بينده عليا
دعوة مفتوحة من رب العالمين
أرتوي فيها من روحه نور...
وسط صحرا من البشر...
تخلو مالحنان و الحنين
تخلومن كل معانى البنى آدميين
حتى الأمل أصبح سراب فى مدينة كبير
عزمت واحد صاحبى على حلمى
!قام باعنى و طلع أصيل
ليه الناس دايما بيضغطوا
على مسام الرحمة فيا
طب ليه ما عاد كتير
يفهموا فى الانسانية
مين الجدع؟؟....مين الجدع صحيح؟
و البطل غاب جوانا فين؟
و ليه كل شئ لازمله قيود
مع ان ربنا خلقنا للحرية عبيد
شعب متلبس....
فى حالة استغلال قلب وحيد
مبيعرفش يقسى.....
مع سبق الاصرار و الترصد
الحالة كلها....
مع سبق الاصرار و الترصد
تفتكروا الناس ديه من كوكبنا ولا....؟
أزياء وشوشهم بتقول غير كده!!
يافطة ممنوع التدخين....
طب و الدخان ده تفتكروا جاى منين؟؟
قالولى...آثار حريق...راح فيه مجتمع
..كان فى يوم برضه أصيل
تفتكروا يعملوا ايه اللى زينا؟
فى حضن بلد بتغربهم فى اليوم
ألف و ألف من السنين
و احنا فيها لاممنا ايه غير حلمنا؟
يفرشلنا قطرة ندى...
فى وسط عادم سيارات!
بيعدم أى شئ جديد.....
أزمة مرور ديه و لا سواقين!
انسان جوانا حزين
بس عزيمته
بتتحدى السنين
و الناس اللى عدوا فى حياتنا
مهما كانوا فى يوم غاليين
الزمن ماعدش يسمح يعملهم تماثيل
و صورهم على حيطان القلوب
لا شئ غير سراب
بندارى فيه فى قلوبنا
شقوق الجراح
وجع اللى راح
و لا عمره اللى راح راح يعود
و لازم يكون اللى فارق مش فارق
و اللى اشترى ابقى من اللى باع
و اللى اشتري من الاصلى صعب فى يوم يبيع
مع ان البلد فى الغالبية اصبحت بياعين!!
و القلعة واقفة شامخة
زينا بتتحدى السنين
بتقولنا أنا برضه كنت فى يوم
حلم....أكيد؟
حلمكم مش مستحيل
ليست هناك تعليقات:
إرسال تعليق