ذكرى

مفاتيح قلبك سرب حمام
على ناصية عينك دمع حنين
لمسة ريشة على جرح قديم
طفلة شقية زرعت بوسة
فى عيون كفك قلب الايد
و سابتها فى الهوى تتعلق
و تعلق قلبك فى هواها
على خدك دنيا بريحة الورد
اما بتضحك قلبى بيرقص بالاحضان
مفاتيح روحك سر احساس
نغمة بتخطف دقة فى قلبك
تجرى الدقة وراها الذكرى
ذكرى بتضحك ويا عينيك
مش قصدها تجلب أحزان
مشتاقة لحد يونسها
من وسط حنينها فى فيضانه
عقلك شاغله بنات أفكارك
و الفكره مؤنث و ده ليه عاشقاك
عامل نفسك ناسي..
و ملكت القلب القاسي..
مش لايقه عليك..
يا مضحك قلبى زى العصفور
من كتر الضحك بقى له جناحين
ابسطها حبيبى ابسطها عشانى
ديه ذكرى شالتنى على مراسيك
ديه مجرد ذكرى و شايلانى
مين عالم ان كانت هتزورك تانى
ربى يفرج همى و همك
ربى يفرح قلبى و قلبك
و ربى الباسط....
ربى القادر عالتساهيل
ابسطها حبيبى
ده الدنيا بتضحك ويانا
و تفكرنا بوقت لقانا
ديه ذكرى ..وشالتنى على مراسيك