صباح الأسئلة..
صباح المواجهة...
صباح الانسومنيا الحادة المستبدة....
انتى مين؟!!
صباح التأمين...عالحياة!
نجمك خفيف...
نفسك ترتبطى..
بس بتعشقى الحرية
صباح الجنان....
حضنك دافى
احساسك عندك منه كام حاسه؟
بتتكلمى كتير و انتى ساكته...
بتاخدى كام قرار فى اللحظة؟
انتى بتمشى عالأرض؟
و لا طايره بجناحات فى السما؟
جواكى كام جرح؟
واحد!.......
انتى مين؟...
صباح...صباح الشاى العادة
بتشربى القهوة مظبوطة ولا زيادة؟
حبيتى كام واحد فيه؟
و لا حبيتى نفسك فى انهى واحدة منك؟
انتى مين فيهم؟...مجنونة و لا سايكوباتية...
و لا مريضة نفسية؟
كل الخطوط اللى فاتت انتهت
و لا خط ينفع تكملى عليه
و انتى بقالك شويه
ماشيه فى طريق
من غير خطوط واضحة
فين اول الطريق الجديد؟
فين الصفحة البيضا اللى كل ما تيجى تفتحيها..
تلاقيها لسه مليانة كلام؟
فين أول الليل أبونوم عميق فى حضن وافى؟
فين صوت حبيبك و هو بيتنفس على سماعة التليفون؟
فين احلامك اللى وقعت من جيبك؟
فين الدعوة اللى نفسك تتحقق؟
أنهى واحدة فيهم الأول؟
انتى مين بالمناسبة؟...
صباح..صباح المناسبات السعيدة...
بتحبى طرق السفر الطوالى
و كل ما توصلى تسافرى تانى
من أول الطريق.....
بتخافى من الاسطوانات المشروخة
مبتحبيش المقدمات..
بتكرهى لحظة الوداع...
مابتستلميش بسهولة للنهايات....
فاهمة و عاملة نفسك مش فاهمة؟
روحك بتروح منك فين كل ما تلاقيها؟
فيه دقة زيادة فى قلبك...
على خلفيه رعشة ايديكى الخفيفة
بتلمسلى قلبك بأطراف صوابعك
كل ما تحسي بنغزه
بتسمعى كام صوت جواكى؟
مين فيهم اكتر صوت مصاحبك؟
بتحبى البحر ليه؟
و سيلة انتحار و لا فرصة جديرة
لولادة قصيدة جديدة؟
بتواجهى الناس بعيوبك...
و بتعتذرى لأتفه الاسباب...
انتى فى انهى حالة فيكى؟
طيب انهى نسخة منك؟
صباح...صباح الشيزوفرينيا...
مستنية حد ينقذك.....
و لا ناوية تسيبى نفسك تغرقى؟
انتى مين؟...فى عالم المجانين
بتسوقى بتهور و انتى لوحدك
بتسمعى فيروز بشوق السنين
عايشه بالعرض و لا بالطول؟
و لا ببركة دعا الوالدين؟
الكتابة عندك أغلى هوايه
عشان بتعرفى تتكلمى فيها
و انتى ساكتة
بتكرهى الفلسفة....
و عايشة على الاحساس باللحظة
انتى عمرك يتقاس بايه؟
بحالة و لا قصة ولا لحظة؟
بتكرهى المشاوير....
مصاحبة الليل....
و غاوية هروب من عيون النهار...
صوفية و لا روحانية؟
مدروشة و لا غجرية...؟
و ازاى حرة و اسيرة فى نفس اللحظة...
صباح...صباح الأسئلة اللى متعلقة فى الهوا
من غير اجابات واضحة.......و لا مناسبة...
ليست هناك تعليقات:
إرسال تعليق