جربت تقف قدام حته من روحك
و تواجهها بنفسك؟!!
"مساء الخير"
"نحب نتعرف!"
"أنا روحك يا روحى!"
جربت تقف قدام طفولتك
و تمسك فيها أحلى ذكرى؟
جربت تمسك أجمل لحظه فى حياتك و تبوسها!؟
قبل ما تتسرسرب منك
فى حركة عقرب الثوانى اللعوب اللى عالحيطه؟
سألت نفسك شوفت كام حيطه
متزوقه بساعه جارى فيها العد على عمرك بالدقايق
و تحويله الى فكه من النوع السَكَه...!؟
سيبك انتا..تحويشة العمر بالذكرى..بالقعده الحلوه...
جربت تكلم الملكين اللى قاعدين على كتافك؟
طب جربت تعزمهم على قعدة روح سكر زياده؟!
ريحة طفولتك ايه؟
فاكر ريحة اللحاف أول الشتا
ريحة حضن أمك ايه؟
فاكر كحك ستو بتاع العيد
ريحة ايام المدرسة ايه؟
فاكر أول مره ركبت عجله
و طيرت الطياره الورق
و انتا غارز رجلك فى الرمله
جربت تعشق سكاتك فى الليل
و تِحَنى جراحك بسواده
لاجل ما يداروا
من لمبة النهار
االيل حمال القسيه
فاكر نعمة الانسانية؟
فاكر ريحة الحب اللى كانت فايحة من قلب حبيبتك؟
جربت تواجه قلب حبيبة؟
و تلم القلب المتفتت من عالارض
و تحطه فى حضنك لاجل ما يشفى؟
...........................هل جربت؟
جربت تشوف فى النور
قلب فراشة...............
تلمس جناحاتها الحريرية
و تسيبها تريح على كتفك
جربت تطير من فرحة فى عز الحزن؟
جربت الزحمة على طابور الدنيا؟
و الرحمة الجايزه على طابور العيش؟
هل جربت؟
جربت تجيب فيلم السهره الابيض و اسود
و طبق بطحينة و عسل واسود
و رغيف مالفرن ملهلب
تحبس بالشاى بحليب
على صوت عم حليم
على قد الشوق اللى فى قلبك
هل جربت؟
على حسب وداد الصبر اللى مكتف يدك!
هل وفيت لحنينك حق؟؟
هل جربت؟؟
جربت تدندن فى الحمام؟
تكركر ويا القطه؟
تفك لأبوك رباط الجزمه؟
تضحك على نكدك؟
تتريق بضمير على أفورتك
الى أن تسمع كركرتك؟
هتلاقى الدنيا كوميدية
ان جربت....
هل جربت؟؟
هناك ٤ تعليقات:
أنا بقى مجربتش أقرا حاجة بالبراءة دي قبل كده :)
و الامضاء طفلتك
:-)
يا اهلا بالخريف :)
المشاعر الحلوة دى والذكريات الغنية بالحب والدفا
حلوة اوى
يابخت اللى يجرب يقف قدام حتة من روحه
يلاقى كل الجمال دا ساكنها
...
على فكرة انا شفت تجربة " جربت " دى تلات مرات لاشخاص مختلفين وبافكر اجمعهم فى بوست واحد لأن كل تجربة ليها عمق وشخصية مميزة جدااا
يكون جميل ان عملتى كده يا اينو...أحب أتعرف على تجارب الناس التانيه....
كل نسمة خريف و انتى روحك سابقة كلامك
:-)
إرسال تعليق