اليمامة البيضا الواقفه على سور شباك بيت الغورية..قامت تتوضى بلون القمر..على لون عيون الفجر و هو بيفتح..قام قلبى زى عاشق بينفض من رموشه أحلام السهر..وحيد..لكن سعيد بالصبر عالوحدة..فى انتظار الفرج..و الرضا بحب الشوق فى انتظار القدر..قدر الحبيب المنتظر...
صوت المعالق و هى بترقص..مع حبات السكر..السُكارى حتى الثمالة..فى كوبيات ازاز مدهبه..مقامها شاى خرزكعب ستو بيدوس عالارض بحنيه..و ينقط حنان متعشق بضحكه شقيه..ضحكه..تستحق الشمس تشرق لها..ستو..نور عيون الصباح الأبها
ستو..ستها تركيه..و العيلة من أصول مغربيه..و بيت العيله فى الغوريه..ستو..اللى روحها بتندهلى..فى ريحة العطاره..و أنا ماشيه على مهلى..قدام روح ذكريات أهلى
من شباكنا الطالل عالغوريه..تتلاقى القلوب بفن المحَكاواتيه..على ريحة بن القهوجيه..و السؤال!..هل يا ترى فى القلب و لا الروح الحكاوى؟
أيتها مكان مهما كان تلقى الناس..ملقى حكاوى لناس مع ناس للناس..حكاوى كعوب متحنيه..و دقون دراويش مصليه..حكاوى على باب الله مستنيه..لابسه تنوره بتلف فيها وتغنى أغنيه..لبياعين المسك اللى جاى من شبه الجزيرة العربية..لاجل ما ينباع على الارصفه جنب السِبَح و الآيات القرآنية
و قُرب الغوريه..تلقى حبات السِبَح نور واصل..بين قلب مسجدين..من بوابة الأزهر لسيدنا الحسين..شي الله يا سيدنا الحسين..متباس من كل خد و عالجبين..بريحة العطاره الساحره..الفاخره..زى ريحة زهرية الريحان اللى واقفه على سور الشباك خجوله...و فاتنه..فى لحظة ما تِفتَحلك قلبها..تُملك روحك فى حضنها..وتطَبطَب عليها..و تقولها...متخافيش..أنا ريحة الايمان..أنا ريحة أيام زمان..عن زمن كان ياما كان..البلد ديه..كانت فيه..أجمل ما كان..
فى شباكنا الأرابيسك..اللى ريحته مسك..أنا و ستو فى البرواز..و ايدين الشمس شابكه ايدينا..فى ايدين بعض بكفوفها المنوره..و النهار الصافى..داخل نوره يتدلع..من عيون المشربيه بيتعايق و يتدلى..على شعرها الحكيم..على شعرى و هو طفل بضفيرتين..ايدين الشمس ممدودالنا..و زهريات الورد مفَتَحَلنَا..من زمن راح أحلى ما فيه..فضل الزمن من غير حلاوة الناس..مُر..زى اندفاع الشجن لحظة حنينه..لذكرى تتدحرجلها الدموع على الخد..من أبعد مكان فى القلب..و الجنة اللى بتخلى الروح تزهر ورد..لستو و الناس اللى راحوا بتوع زمان..و كان ياما كان..فى يوما ما...لى ذكرىٌ ما...فى جنة الورد
هناك ٦ تعليقات:
لكن سعيد بالصبر عالوحدة
:)
يا جنة الورد .. و دقة القلب .. و سمار الننى جوة العيون بيدى من الإحساس الف مليون حس .. يا فراشة الجنة و الف لون عالجناح يتمد .. بتلمسى فى القلب نبضة بكلام منظوم برقة و بنسايم هادية باردة وسط حر الكون تهف .. شوفت رسمة ويا دقة مزيكا بلدى جوه شعب عندة قلب .. اه لو تعلى الصوت و يوصل عند كل معدى مطاطى الراس وسارح اه ماهو بيفكر فى امبارح .. مين يشوف و مين يحس ؟ زى فراشة دايرة تلف لف ...
حلوة يا غادة اوى
يا صباح الأستاذ سعيد بالوحدة زيي...صباح الفل يا عز :-)
و صباح اكتشاف لشاعر جديد أسمه سامح..ايه يا سامح ده انتا يتكتب شعر كمان :-) - صباحك جنة ورد....و تسلم روحك على الابداع ده...
بعض من إبداعك يا غـــادة
ما هو كلامك الجميل دة هو اللى الهمنى اكتبلك الكلمتين دول فى الرد
اليمامة البيضا الواقفه
على سور شباك بيت الغورية
قامت تتوضى بلون القمر
= = =
صوت المعالق و هى بترقص
مع حبات السكر
السُكارى حتى الثمالة
فى كوبيات ازاز مدهبه
مقامها شاى خرز
= = =
فى شباكنا الأرابيسك
اللى ريحته مسك
أنا و ستو فى البرواز
و أيدين الشمس شابكه ايدينا
فى ايدين بعض بكفوفها المنوره
و النهار الصافى داخل نوره يتدلع
من عيون المشربيه بيتعايق و يتدلى
على شعرها الحكيم
على شعرى و هو طفل بضفيرتين
= = =
كفاية إنك خليتيني أشوف الغورية.. وبيتكم في الغورية
يارب يا أحمد عقبال ماخدك هناك بقى المرة اللى جايه....تسلملى يا صديق :-)
إرسال تعليق