شئ غريب قوى...
القصه اللى فاتت خدت منى شال
و قصه الحلم اللى جاى من السفر ادتنى شال
صحيح..زي ما بيقولوا
الحاجه تلف تلف و ترجع لصاحبها!!
ليه الناس فاكره الدموع ساكته؟
و ليه انفاس الخلق م الهوا متاخده؟
و ليه قلوب الناس م الحزن متاكله؟
و الخطاوى بتغرق ف اكوام القسوه؟
ليه؟...و السبب..الوجيه...فى بلدنا غير وجيه
ليه فى السفر العقل يقدر على فعل 'انسي'؟
و ليه العمر بيتقاس بالسن مش بالحكمه؟
و ليه الوشوش بلا حياء بتغير الالوان و...تتحول؟
و ليه الزمان شبه الفَرشه اللى بنام عليها
مبلوله بافكار مش متوازنه...
بتنقط من حكايات مش مفهومه...
و مرميه على الأسفلت...
من وقع الحادثه...
ليه؟..اعوذب بالله من كلمه ليه
اوعاك تسأل ليه و ازاى
و اوعاك تحزن عاللى يفارق
و اوعاك تهرب من دنياك ف النوم
و اوعاك تملى الشوق لحضن حنان بطعام
و اوعاك تسمع للى بيتقال حواليك
لاحسن تلقي الدنيا سراب م اليأس
محبوس على طرف خيالك بين حاجبيك
و مخليك واقف فى النص...
لا انتا حاولت و صِبت و لا انتا غلطت
و لا منك صليت و لا سبحت
كنت زمان فاكره الدنيا بتيجي تطيب خاطر...
كل ما دبدب فى الارض و خاطر...
...انه يخبط بدموعه على المناديل
طلعت دنيا فشنك صحيح...
سايبه الناس تعرق بدموعها...
من غير ايد تمسحها ولا منديل..
و دمعك..حبات حزنك..
ف الهوا متنطور
و بينزل عالارض و يتكسر
و بينداس باقدام حافيه
....على رغيف العيش
اما عبيطه صحيح...
تستاهلي اللى بيجرالك
و لا تستاهل منك ايامك
كل احزانك ..
و لا تستاهل كل احلامك
انها لاجل الحب تضيع...
و قصايدك زى حياتك
زى طاحونه......
دايره بسبع سواقي
وعروق أرضها ف جفاف
زيك..فايض كيلك من قله راحتك
اللى براحتك.....
سايبه حياتك تمشي فوقيها
..........فوقي يا حلوه
قالتهالى الست الحلوه
و انا باكعبل و اكفي
على اول سلمه فى القصه
بكره شبابك يخلص منك
او تخلصي منه...
بكره..امبارح..فارق بينهم مشهد
راح يتحول...ذكرى
تلعب دور النجمه ف دمعك
و انتى بتبكى بحرقه
على احلام وقعت من عالشجره
....اوراق دبلانه و منكسره
زى حياتك اللى محدش دريان بيها
و لا من شاف و لا من داب
عاشت مره و ماتت...فجأه.....من سكات
هناك تعليقان (٢):
أيوة؟؟؟
أيوة؟؟؟
من ساعة واحدة!!!
سكات ايه ده اللى راحت فيه؟؟!!!
أنا عايزة اقول لفراشة..انى كنت لسة بقرا
little mermaid...did u know that u get an immortal soul if someone loved u soo dearly!!!
and i already do love u soo dearly that i gav u the immortal soul and retained mine as well ;)
على فكرة..الأحلام لما بتتكسر بترجع تانى تتجمع و تعمل حلو تانى..فيه أحلام كتيرة صغيرة مع بعض..
و الدموع اللى مابتتمسحش بتنزل على القلب تخليه ارق!!
و الفراشات اللى بتطير دى (عارفاها؟؟) مابينفعش تقف فى حتة لازم تفضل على طول طايرة..
نورتى الفراشة يا ريهام
:-)
إرسال تعليق