أحلى ما فيك

و بطرف صباعك المس وش الميه..و سيب احساسك يرسم على وش العالم دواير نور..و سيبها تفور..و تدفى الأحضان و ترش بخور..صبرك عنوان للفرح و هتنول

و فى عز الضيق..اسحب نفسك بشطاره..و استأذن من ضيقك مشوار لآخر الحارة..قول له أصل أنا زهقان غاوى سلام و الدنيا ماشيه بقطاره..مش ناقص عطله و استسلام..أنا رايح أواجه بشجاعة

و اضحك لملايكه لسه بيبعتهم ربك..يرسمه بسمه على وشك..و انتا فى عز النوم

و امسح دمعك بايمان..بيقولك ان الدنيا يوم كشريه..و يوم سنيوره و يوم صعبه و مش مفهومة....و بدون أعذار..مطلوب منك تفضل أحلى ما فيك..علشان تفضل دنياك حلوة جوا عنيك..

و فى أقرب من طرفة عين..ربك راح يفرجها أكيد..علم قلبك يبقى بسيط..و خلى حمولك ع الرزاق..بضمير..رزقك عنك مش هيغيب

خارج نطاق الحدود

حدود الكون ستاير
زيح الستاره و اكشف المستور
افتح حدود الكون ..مد راسك بخفة و هدوء
و بخفة الظل عدى بروحك حدود
و استنشق من هوا الغيب و اللامعهود

حدود الكون بيبان
مين هناك؟
خارج حدود العاده و المألوف
و تيمة المعروف
و مشهد رومانسي زهق..فى الاعادة من ألوف
و النتيجة..انتحار حَبيب شنقاً من على كوبري قصر النيل..رغم الأُسوُد!

مين هناك؟
خارج سياق القدر و المكتوب...
خارج زحام الانتظار المشغول
خارج نطاق الخدمة الاجتماعية...
و الانتماء الى قضية سياسية...
و المسلسلات الدرامية
و الانتخابات و الافيشات...
و الاجتماعيات و الانسانيات..
و مين اللى عاش و مين اللى مات

مين هناك؟
مكتوب بالبونت العريض
..تفتكر انتا؟....حُر..مش سجين
خارج أسوار الكون الحديد
خارج روتين فطرة البنى آدميين
و محاولات للحرية..مضنية..انتا ليها أسير
و حوارات مالهاش مجالب لا من قريب و لا من بعيد

البس توب الجديد
مين هناك؟ بص شوف
و ان بصيت شمال يمين
جنوب و شرق أوسط ..مش سليم
تلقى الوجود استهلاكه أمر حتم..أصبح..مهين
مشهد الكون العظيم
و البشر آلات دايره بأنين
جوا دواير مفرغة...و الانتاج..نكسة..و صنع فى الصين..
فى صحوة الموت اليتيم
و كل لفة تزيد م الفراغ...سنين
فراغ..رغبة التغيير
فراغ...تملاه حدود..ترجع سجين
بين انشغال بالقضية
و بين هوية..
مثواها تراب يتبل بدموع صبى أو صبية
عصرية كانت أم مغربية

و الحياة..ما هى الا...هى...
فيلم يعرض على آلة سينمائية
جوا قوصة مونتاج سمائية
و النهاية..حتماً..تراجيدية
الا للى اتوضى لصلاة الحياة بروحانية

روح..اغسل خوفك بروح
عزمك لا يمكن يروح
اخلع هدمة المزعوم
اخلع حدودك الداخلية
عيش خارج مساكن تقليدية
و بتأني و صمود...
حاول تتوب...
عن عالم المشهور و المكرر المقهور
ممكن يكون..
اختيارك انك تعيش محدود
و بايدك يكون...
أجمل ما فى الكون خارج نطاق الحدود

ان لزم الأمر

ان لزم الأمر
راح يتعاد المشهد من ع الشجرة
عصفور يفرد جناحاته
و ينفش ريشه
و يطأطأ رقبه
فى أتم الاستعداد للزقزقه و السهره
و اسمعه يحكى حكاوى العمر الجاى
و عمر طفولتى اللى بتكبر

ان لزم الأمر
راح ألبس لبس الحرب
و أنزل ساحة حزن
و أحارب من جوايا جيوش الدمع
يمكن أقدر أعيش من غير ما أموت م الحزن

ان لزم الأمر
هاعيش فى الاستسلام
لضمير صاحى ما بينام
و اموت من غير حضن و لا استئذان
فدا وطنى اللى بيتهان
رغما عن كل آدان

ان لزم الأمر
راح أعيش ويا الأحلام
من غير ما أتهته و أنا بأتخطى الجدران
لأحلام بتجينى فى كل منام
و تموت ساعة الصحيان
من واحد ماشي و حاطط فوق راسه...حال الدنيا الزهقان

ان لزم الأمر
راح ارفض انى أخاف
...من ليله عيد
بأستناها و متجيش
راح أنسي كل المواعيد
و أتعايش مع عالم عادى
و أفضل بوجود عادى
يعنى..انسان غير المعتاد و العادى

ان لزم الأمر
راح أموت و اسحب نفسي
من دنياكم الافتراضية
بضربة عصا سحرية
تصبح كان..مكانتش
و تصبح نِفسي..سدة نِفس
و أصبح و كأنى ما كنت

ان لزم الأمر
راح أبدأ قصة جديدة
و من أول سطر
راح أكتب ...
لزم الأمر
لاعادة ترتيب أحداث
بعد ما تم الالقاء فى اليم
كان واجب عملية انقاذ
بشريط مليان بالأفراح
و لآل الشورى لجأنا
تاريخى سعادة البيه
و كده من غير ترتيب...
تم اشادة صرح قديم..
للأحزان
و ازالة اى آثار لآلام
فى معاهدة صلح مع النفس
و تسامح م اللى بنفس
و أبدا لن أنصاع
و ان خَصصتم راح أعمم
و ان عَممتم راح أخصص
و ان أحبَطتم راح أزهزه
و ان كنتم سلب راح ابقى ايجاب
و ان تم محاولة تنغيص الحال
بمحاولات تثبيط الهمه
راح أنجح من قلبى و حقه
غذبن عنكم...
راح أتخفى بطيف غلاب
ما بين أبيات للشعر و قافيات
و أدخل فى تجاهل تام
لابصر ايه و مش عارف ليه
و أعيش فى خيالى
بأخلق للدنيا وجود ضاحك مالى حياتى
بنغمة لا تبالى يا قلبى لا تبالى
و تزقزق ويا العصفور ع الشجرة
و أعزف هارمونيكا
تحت أشجار المانجه
العب ويا ملايكه
و نعزف فرح على كمانجه
و نكتب ترنيمه بنغمه
ان لزم الأمر او ملزمش...
راح افرح..و أنا كلى عزم و همه

مستجدة حياة

أنا مستجده حياه
الفجر حاضر و لا بكره
الصديق صان...
و لا خان خيانه نكره
الوقت قضى و لا فات
و ولا همه بكره
الشمس طالعه
و لا ناويه تستخبي

أنا مستجده ف الخبره
وجب عليا الانتباه
كما حرف الالف
فى طابور الصباح
و العلم فى انتفاضه الشده

أنا مستجده ع الازمه
كارثه ضياع النخوه
دفتر المواعيد مقفول انهارده
لحين ثبات قلب وافى مش قلب باجنده

أنا مستجده ف الحاله
لحلم أثبت استحاله
كان ماشي و شايل رساله
قابله وطن شايل سلاحه
و قبل ما يكمل كلامه
قام نشه برصاصه
أمن قومى!...مش قضيه و لا اهانة

أنا مستجده اللحظه
وقفت انادي على صوتى
خاني و اتحبس فى دموعي
عاد و لم يعد.....
و لم نعد نعرف الاولويه
و الغرض من الحبكه الدراميه

أنا مستجده شباب
لما الوجوه تتحط ف كتاب
و كل وجه له صورة
و كل صوره ليها حاله
مكتوبه و متعلقه ف يافطه
و ناس لابسه قناعاتها
اقنعه من الوبر ناحله
و اوهام حقايقها متاكله
و ازاى الشمس في شرقي
يستني القهوه ع الالى
و يهدي ورود من صنع اعدائى
و ساعات م العمر و الصحه
تموت م الجهل منتحره

أنا مستجده قصايد
كانت ف الماضي مجروحه
و مده بوزها زعلانه
و حتى بايخه فى كلامها
الحاضر ماضي ف مواجهه
و قصايد ف صعوبه متزايده
و ليا قصيده مبتسمه
بتفك الخط خجلانه
تغلط فى النحو ببراعه
بتتسرع لتتباهي
فتتكعبل.....و تتلاشي

النشرة النفسية

"فى مدينه المحسورين نفسيا..كان اليوم حاطط ايده على خدوده..من كتر همومه الحياتيه..و بناءا ع النشره الجويه..جو اليوم كان كله قسيه..راح ساب شغله و راح ساب بيته..و قرر يطلع يلبس جلابيته..كان ماشي ب افكاره عريانه..حاطط ايده ف جيوبه..بيلف شوارع بتلومه..رغم نسيمها اللى بيتلاعب بهمومه..كان محتار..و عقله اتجن من الافكار..قرر انه هينهار..و يفوت البيت و الغيط و الافكار..و يروح على اقرب (مش عارف اعمل ايه؟)..يتسامر وياها و يحكيلها على كل (ياريت)..راحت من عمره فناءا..راحت من عمره فداءا..

و اذا بها بترد تقول..
- أنا يمكن مش عارف ايه و لا ليه..بس انا دايما زي قناع..حقيقتى انك عارف جدا و لكنك مش قادر تدن..صوتك مش قادر يوصل..لبدايه..و ناهيك عن نهاياتك البطوليه اللى واخدها على دموعك الغاليه..من خوفك م القرب و تعبه..من خوفك من خلق و غدره..

و اليك بيانى..بأهم ما يمليه القلب الحاير على حالك الداير حيانى ف دواير فراغيه،

كن نرجسي..و لتعبر عن نرجسيتك بشياكه..
كن بحار..و لتعبر امواجك العاليه برزانه..
كن فنان ف الخطوه..و لتأخذ خطاويك بمهاره..
كن اراجوزك وقت ما تيأس..ضحك نفسك على شكلك و انتا بتتكدر..
اجمد..اثبت..حاول تتوازن..و اعملك خطه متوازنه..كده بهداوه..
ارفع راسك فوق كل النظرات اللى بتُحكم و بتتِحَكم..
وجه طاقتك لسحابه..بتحرص راسك من مشهد ناس فيه بتدبر لهزيمتك..
من طيبتك فارشينلك غيبتك بقساوة...
ارفع قلبك فوق كل هزيمة..و اعرف ان فى كل هزيمة..غنيمة..لعلام..مسيره فى يوم هيدون فى نجاحك

- محتاج..لاجابة تبل الريق..تروى الجوف من هوى مجروح..تروى الجرى على الارزاق بشويه راحه..تروى سؤال عطشان لاجابة..انهى طريق اختار؟ و ف انهي تاريخ اتشاهد؟ و لا انا هافضل طول عمرى احتار ما بين أبواب و طرائق؟ شخيخة ف صندوق الدنيا أنا يعنى و لا عجايب..

- سؤالك باين من قبل كلامك..العين دايما تسأل قبل لسانك..بص كده و قرب..تلقي التاريخ بيقرب..التاريخ أبو الف باب..اتفضل..كلهم قدامك...و لكن...لاتخاذ هذا النوع من القرار أبو باب..يلزمك تحديد مسار..ولتبحث فى غموض أسرارك..خليك واثق من عنوانك..و لتعلم جدا و بشدة..انك جواك بوصلة ربانى تدلك..مع تنويه مسبق عن وقفاتك وقت الشدة..و عليك الانصات...من غير شوشرة ع الارسال..وأخيرا..يلزمك..شئ م السحر اللى تاب..

خبط كف ف كف..هز كتافه و قال الاوف..و احتار ف طريقه و لف....
- سحر م اللى تاب!!..ديه فزوره و لا عذاب..الاحلام فاتحالى حساب و ده برضه وقت عتاب..

مشي ف طريقه كأن ما كان..عامل نفسه بيرقص كان كان.
-.يائس يائس بس اعيش..ماشي و ف جيبي و لا لقمه عيش..حط الاحلام جنب الاوهام ف طابور تذنيب..و شخط بعلو الصوت و التأنيب.. سيبونى اعيش منسي و بأتناسي..المستقبل ف ايديكم ماضي..الاحلام الحيه ف بلدكم أمواتي...

نغزة قلبه كسرت عينه..شاط يأسه بعزمه و طوله و عرضه..طار يأسه و خبط على كتف المصباح..مصباح صداح..واقف يستعرض لمعانه فى كل صباح.. من فاترينه شايله معاه ياما عيون طلت بأمانى من كل مقام..من باشا لافندى لفلاح..من فاترينه عمك مفتاح..

-مش تفتح عينيك و انتا بتقرر تضيع..يمكن تواجه نفسك قبل ما تدوسك مواعيد

-انتا مين؟!!

-سحر م اللى تاب ف الاساطير..سحر تاب من سنين..انا مصباح علاء الدين..ناوى على ايه يا ابو عقل كلامه عبيط..يا ابو قلب عنيد؟

-أستغلك اخر استغلال..فك احلامى من الاغلال..اسحرني و امحى الاطلال..ارفع عنى قهر الاوغاد..خلى بلادي تعود امجاد..و انا اكون واحد م الابطال

-انتا فاكرنى اله!!...أنا بأعبد زيك فى الله..و كنت زمان بأحيي الأساطير..انما دلوقتى سحر...و تاب...

-دلونى عليك أحلامى..علشان أبدأ من تانى كلامى..

- و لا ميت مليون مصباح يكفوك...لاجل بلادك ما تغنى أمجاد..لاجل أحلامك ما تعيشيى حداد ..

- طب أنهى طريق أختار؟ و ف أنهى تاريخ أتشاهد؟ و لا أنا هأفضل طول عمرى أحتار؟..دلنى من غير استهزاء..أنا يمكن عايش باستهتار..و زمانى رايح جاى..و لا منى عايش و انا رايح..و لا منى عايش و أنا جاى..أنا تايب..و لكنى...تايه م الخوف..من حلمى مع انه رضيع..ب ايديا أقدر أختار...و لكنى...محتاج لفنار..

-اختار تبدأ بالموجود..سيبك من أى وعود..اقتل خوفك بمخالب من وزن أسود..و اوعى يتوه حلمك ف احلام الناس..اعرف نفسك قبل ما تنداس..اجمد ع الدنيا و ماتنساش..ان ف قلبك سر نجاه..

عدى الليل و نهاره وراه..على أحلامه من وسط مرار..و نقلت نشرة قلبه الحيران...:
"فى مدينة الحالمين روحانيا..كان اليوم بيفكر بعقلانية..لابس فى أتم استعداده..لاستقبال علامات روحانية..لطريق واضح تساهيله ربانيه..و بناء ع النشره الجوية..جو اليوم كان كله تماثل..لشفاء من يأس تماثل..ان أنا ابدا لن أنصاع..لمخاوف بتلألأ خطواتى..ان انا هأفضل كلى تفاؤل..رغما عن كل آهاتى..بأضرب فى الأرض أنا لاجل ما ألاقى..و مهما اتكسر من مجاديفى..ان مت شهيد الأحلام..أهو اسمي راح أموت مرتاح..و نهاية.......نرجوكم..لا ملام."