الأربعاء

لِم الأفكار

لِم الأفكار المتنورة ع الصفحات
لم أفكارك م الشوارع و القهاوى و الهمس و اللمسات
لم أفكارك اللى واقفة ورا الشبابيك تدارى بكسوف من طلعة الشمس

لم أفكارك من شنط العيال و هى راجعه م المدرسه
و حكاوى الستات فى قعدات العصارى و الدردشة
و من صوت أمك اللى ما بيفارقش خيالك
و من نظرة أبوك و هو ماسك السيجارة..و لابس النضارة..و بيقرر و يبت بنظرته فى حياته و حياتك

لم الأفكار من على حبال الغسيل و خيوط السنين
و من على مراجيح القناطر و قعدات الحسين
و من تحت اللحاف و الدفا
و من بين أركان الصلاه
و من فوق الدولاب و المكتبه

لم أفكارك م البن اللى جوا الفنجان
و من طعم التجارب و الحكايات
و من حبات الندى اللى واقف مع العصافير على الأغصان

لم الأفكار من على جدران المكان
و من روح المسك ف الريحان
و من عيون اليمام
و من بيت الجيران
و من على كتاف الشماعات و صوت الآدان

لم الأفكار من على عقارب الزمن و سير اتجاه الساعات
و من أصوات الاذاعة و التليفزيونات

لم أفكارك من قدام بيوت الناس
و من نور البيت اللى جاى م الشباك
و من حبر القلم اللى بينقط ...و لا يكتبش
و من صورة العلم اللى بيرفرف...و لا ينصفش
و م الحلم اللى بيراودك...و لا يتحققش
لم الأفكار من صورتها و صورتكم و صور الحياة التى كانت..و ما كانتش

لمهم فى جيبك...و استخبي فى كف الظلام...و دوب ف الزحام...و ف عز الليل..اطلع اقف ع السطح...طلعهم من جيبك...و ابدرهم نجوم ف السما...تلقى الدنيا نور و الليل أمان