الجمعة

من سكات

شئ غريب قوى...
القصه اللى فاتت خدت منى شال
و قصه الحلم اللى جاى من السفر ادتنى شال
صحيح..زي ما بيقولوا
الحاجه تلف تلف و ترجع لصاحبها!!

ليه الناس فاكره الدموع ساكته؟
و ليه انفاس الخلق م الهوا متاخده؟
و ليه قلوب الناس م الحزن متاكله؟
و الخطاوى بتغرق ف اكوام القسوه؟
ليه؟...و السبب..الوجيه...فى بلدنا غير وجيه
ليه فى السفر العقل يقدر على فعل 'انسي'؟
و ليه العمر بيتقاس بالسن مش بالحكمه؟
و ليه الوشوش بلا حياء بتغير الالوان و...تتحول؟
و ليه الزمان شبه الفَرشه اللى بنام عليها
مبلوله بافكار مش متوازنه...
بتنقط من حكايات مش مفهومه...
و مرميه على الأسفلت...
من وقع الحادثه...
ليه؟..اعوذب بالله من كلمه ليه

اوعاك تسأل ليه و ازاى
و اوعاك تحزن عاللى يفارق
و اوعاك تهرب من دنياك ف النوم
و اوعاك تملى الشوق لحضن حنان بطعام
و اوعاك تسمع للى بيتقال حواليك
لاحسن تلقي الدنيا سراب م اليأس
محبوس على طرف خيالك بين حاجبيك
و مخليك واقف فى النص...
لا انتا حاولت و صِبت و لا انتا غلطت
و لا منك صليت و لا سبحت

كنت زمان فاكره الدنيا بتيجي تطيب خاطر...
كل ما دبدب فى الارض و خاطر...
...انه يخبط بدموعه على المناديل
طلعت دنيا فشنك صحيح...
سايبه الناس تعرق بدموعها...
من غير ايد تمسحها ولا منديل..

و دمعك..حبات حزنك..
ف الهوا متنطور
و بينزل عالارض و يتكسر
و بينداس باقدام حافيه
....على رغيف العيش

اما عبيطه صحيح...
تستاهلي اللى بيجرالك
و لا تستاهل منك ايامك
كل احزانك ..
و لا تستاهل كل احلامك
انها لاجل الحب تضيع...

و قصايدك زى حياتك
زى طاحونه......
دايره بسبع سواقي
وعروق أرضها ف جفاف
زيك..فايض كيلك من قله راحتك
اللى براحتك.....
سايبه حياتك تمشي فوقيها

..........فوقي يا حلوه
قالتهالى الست الحلوه
و انا باكعبل و اكفي
على اول سلمه فى القصه
بكره شبابك يخلص منك
او تخلصي منه...
بكره..امبارح..فارق بينهم مشهد
راح يتحول...ذكرى
تلعب دور النجمه ف دمعك

و انتى بتبكى بحرقه
على احلام وقعت من عالشجره
....اوراق دبلانه و منكسره
زى حياتك اللى محدش دريان بيها
و لا من شاف و لا من داب
عاشت مره و ماتت...فجأه.....من سكات

حِبنى بالتفصيل

أرجوك...حِبنى بالتفصيل...
ازاى بتحبى القهوة؟
....على دقة قلبك مظبوطة
و ازاى بتحبى اللمة؟
.....جوا الحضن اللى بيجمعنا
ايه أحلى هدية بالنسبالك؟
....ونسك بالصوت و الصورة
طب و الألوان؟
....لون الدنيا و أنا وياك
بتحبى البحر؟
....واحنا الاتنين قاعدين على شط الرمل
بنتحاكى..بسكون على وتر الاحساس الحر
ازاى أما هتزعلى أعرف أصالحك؟
.....احضن فيا حقيقة زعلى..هتلاقى الحب اللى بيملاك
بتصحى الصبح مزاجك ايه؟
....بوسه عالريق و شاى بحليب..طعمه حنان
فين تفصيلك م الاجابات؟
.....تفاصيلى شبه القصه اللى بتجمعنا فيها ملامحك على وزن ملامحى
و القافيه ف حالة ما بين قلبين جوا روحين مهما الدنيا غلبتهم
يرجعوا يلقوا فى حضن الحب حياة بتجمعهم
طيب و أنا راجع م الشغل و زهقان!؟
......نقسم زهقك على زهقى و نطيرهم م الشباك
طب و انا مش عايز حتى كلام؟
.....هأستناك و منين ما تمد ايديك..هتلاقى...على اول طرف فى أول حرف فى أول كلمة من جوا عينيك..عينى بتلقاك بحنان بيضم حنين
......وان غضبان؟
هأنزل تحت الموجه العاليه و أبحر كعروسه بحر...و أول ما الموجة تهدى..هأفرشلك عالرمله سلام
...............خايف
........هدهد خوفك جوا ف حضنى..و انتا تنام ..تصحى تلاقى الدنيا أمان.ا

الأحد

حِلمي..البطل مات

مساء تايه...

مساء شكلك طالب فيه مساعده؟

طالب عنوان

تايه؟

توهه مالهاش مكان....توهه واقفه بين الزحام بتنداس باقدام النسيان

طلبك؟

البطل؟

البطل شهيد

ايوااا...مهزوم نصر الشهيد...ده اسمه؟

لا يا بنى ديه حالته...اتشاهد و هو بيعدي الشارع ما بين خيالى و بين ارض الواقع...

لا يا حاج..انتا فاهم غلط...البطل عايش...بس الناس هى اللى تايهه عن العنوان..عايش...عايش فى وسط زحمه كبيره...حواليه يجي ميت عيله من شرق و غرب لولاد العم وولاد الخال وولاد الاب وولاد الام وولاد مرات الاب وولاد البلد...يجى ميت عيله..و لا عيله منهم عيلته بجد...لوحده وحيد فى وسط عتمه الزمان..زمن أعمي البصر و البصيره..عارف النور و لا يشوفوش....حاسس الغلط و لا يوم بيحط علامه صح ما بين الاقواس....

شكلك عارف العنوان؟

حى الشعرا حاره الشوق باب الحكمه...صعب تغلط فى العنوان...بس سهل تتوه منه فى حال الزمان..على باب الحاره رسمه لولد صغير شايل فى ايده ورده و مادد دراعه بطول الحيطه لاجل مايوصل بالورده لرسمه البنت اللى قاعده تعيط...هى...مش شايفاه.. وهو..فى زمن تانى كانوا الناس فيه لسه بيوصلوا الورد بدل الشوك فى قصص الحب ايام ما كانت حقيقيه....

هى ايه؟ الناس و لا قصص الحب؟

الاتنين....

و البطل فين؟

مهزوم.....بيته اول بيت على اول عطفه حنان فى قلب كفك اليمين...هتلاقيه عايش على مشارف زمن الحلم القديم..ان لمسته باطراف قلبك تقدر تلونه..بينزل الصبح بدري يدق بقلبه فى خطاوى الطريق بيحلم ان الشوارع نضيفه لان الناس لسه نضيفه...فى بلد كان اسمها فى حكايات زمان بهيه و كانت نفسها عزيزه و رضيه و عفيه...هى الوصفه كده

يحنن يا بنى.....

خلي صبرك عليا جميل....اللى وصفلى قالى اول ما تلاقي البيت اطلع لحد ما توصل لاول فتحه نور تتلاقي فيها عيونك و السما

سؤالك عن بطل و لا شاعر يا بنى..غَلِبتنى..

الفرق واحد..بطل و شاعر..و هى ديه مشكلته مع انهم بيحكوا عنه و يتحاكوا..كل يوم يحبك الخدعه و يشيل الشنطه و يفوت على رزقه

موظف؟!!

ديه الخدعه اللى لازم يعيش بيها....

يا بنى تايه حتى ف التوهه لا انتا عارف عنوانك و لا انتا فاهم طلبك بطل و لا موظف و لا شاعر..عايز نصيحتى..ارجع للى وصفلك...

هي ديه المشكله...

تاااانى؟

اللى وصفلى كان اسمه حِلمي و عاش ف زمن عامل زى شله حراميه قاعدين قعده خمورجيه و فى سكرهم و من وعيهم بلا وعيهم بيسرقوا الفرح من ننى الطفل الرضيع و الضحكه من كحل العذارى و نخوه البسمه من فك الرجال..زمن البني حراميه سارقيين الامل و الايمان....سارقيين الرحمه م القلوب...و اللحن م الحناجر...سارقيين البلد باللى فيه....سارقيين النضافه م البيوت و النفوس....

سَرَقُه حِلمي؟

لأ....قتلوه..حِلمي اللي كان ساعات أوانه ورد..و ساعات بساط الريح يبوح بفوات العمر و يفوت العمر من تحتيه...زى ما يكون بيسحب أقرب كرسي على أقرب قهوة بلدى..و يقعد بايده على خده...ساند افكاره على ريحه تراب العصاري المبلول...جوا الحواري اللى كانت ف يوم نضيفه...قله النضافه ف النفوس و الشوارع..جننوه..خلوه يحس انه مستحيل...مَقدرش..اتخنق.....طق..مات...

يا بنى انتا تايه و بتقولى حلمي مات ...و انا قلتلك البطل مات..

جواك و جوايا و جوا قلوب الناس..

مات يا بنى مات...مهزوم نصر الشهيد مات...

ساعدني....

يحنن...

ساعدني...

يحنن...

ساعدنى....

يا بنى...صدقنى...حلم البطل مات

..............ِحِلمي البطل مات
..................