الأحد

كل شئ بأوان

فى الحب و التعاشيق

فى المغنى و الطقاطيق


فى روح الليل

نسجت أنا بروحى

ألف بدر فى ليلة عيد


على لحن عصفور الجنينة

شقت عينيا الضلام

اللى انكسي بتوب نور النهار


مع كل نبرة ادان

قلبى بالدعا يدوب

فى رب العباد


و من عباد الشمس

فرشتلك أنا قلبى بستان


و اللقا بالسكن نصيب

و النصيب ما بين اتنين

...........له أوان

كما كل شئ بميعاد

لا يعلمه الا رب العباد


برحمته يطلى القلوب بالربيع

يصبح ألم الفراق...

أجمل من شجن الخريف

و أمطار العيون بترخ فرح

يبرق شعاع الشمس من قلبها..

و يشرق فى الروح بالامل

و أنا املى ايه غير يقين

باسمك المجيب


أمر القلوب من تدبير ربى العظيم

لا ليه و لا ازاى و لا شئ مستحيل

ده حتى حرام ...ان كان ايمانا اكيد


فى رحلتى انتا الوصول للبداية

و انتا اللى باتمنى فى رضاك النهاية

بالحلو فيها و المر منها

على عهد الحب متفقين

و بالنصيب و القدر راضيين

و ايه أقولك يا حبيبى

غير لينا رب جميل

فتاح عليم رزاق كريم

و من رحمته...الحكمة فى النصيب

جميل يا حبيبى جميل

قلبى مزادات احساس

عصافير بتغنى
ليل و نهار

فجر الحب يسرى
جوا الروح أنهار

و أنا أدوق الشهد
من رمش عيون الكون

التوت ملتوت
على فرع أخضر
مش مهجور
و أرضى..
فى روحك خضرة

العشة ساكن
فيها روحين
صحيوا فى ليلة
بقوا روح واحدة

و أنا قاعدة
لوحدى باستناك
على مرجيحة
قلبى الحيران
مش فاهم ازاى
احساسه بيك بيزيد
مع كل عذابه وياك

قلبى مزادات احساس
اتلموا عليه الأحباب

قلبى شبابيك مفتوحة
و أبوابه تاخدك بالأحضان

و برغم انه أحبابه كتير
فيه واحد قلبى بيستناه
حبه فى قلبى
محفوظ فى الروح
و مهما اتزايدوا الناس
على قلبى فى الاحساس
ولا واحد منهم زايد
عن حبك فى الاحساس

زيارة قلبية دائمة

هو كل ما يجى يخرج تمسك فيه...

ما تسيبه يمشى يا أخى!...

و لا خايف تقعد لوحدك؟!

غاوى انتا تضحك على نفسك...

و بعدين معاك....

ما هو قعاده معذبك...

و فراقه مش راضيك...

أصعب شئ

ان حد يبقى موجود جواك

بس مش موجود معاك...

و انتا عامل القعدة بيتى

ناس خارجة و ناس داخلة.....

لكن اشمعنى ده يا قلبى

اللى انتا ماسك فيه؟

سرب ملايكه

اتفضلوا..!

آدى حاجتكم اهيه..

عدة الحياة..

اللى أغريتونى بيها

اتفضلوها..

وردولى جناحاتى من تانى

انا راجعة لحقيقتى

قبل حضارة الانسانية

اللى خلتوها مزيفة

بأفعالكم..

خلاص مفيش امان ليكم..

راجعة تانى

اطير ويا اسراب الملايكه

و فى سرب معدى من هنا

كمان شويه

هالحقه

بس محتاجه جناحاتى

اللى آخدتوها منى

علشان اعرف اطير من تانى

ويا أسراب الملايكه

الخميس

حالة ابداع


حيطان روحك معبد
مكتوب عليه "ممنوع الدخول"

مراقبتك للحياة كأنك ضيف فيها
عشقك لوحده الهروب
من شئ منك أو فيك

خضوعك الاختياري للعزوبية المطلقة
و تزعمك لدور عدو المر أه
كلهم حاجات قدمت
وفات عليها سنين

مش قادر تفهم إن البرمجة الانسانيه
شئ مستحيل مع حياة الترحال.....
.الرسام..المتوحد...الفنان
اللي انت عايشها في قصايدك

توأم روحك!
اسمه الوحدة

قوضتك!
فيها أصعب عالم ألغاز في العالم

عيونك!
سحابه ها يمه في كون الأفكار

عنفوانك!
من عنفك

حياتك!
في فكره بتتغير كل كام دقيقه

البشر عندك!
قصص فى قصايد

و معنى الإنسان الحقيقي منك!
مستخبى فى سكة أوجاع..

حساسيتك المفرطة!
متداريه في سخريتك الجبارة

تجاربك!
حقل ألغام
اى لغم فيه
ممكن ينفجر فى أى لحظه

إبداعك!.....
قلمك!....
ورقك!...
هما نشوتك

حزنك!
ميوؤس منه
يس عامل زى كائن لطيف
عايش جواك
بيزيدك جاذبيه

لمساتك! ...
لسه ملمستش الواقع
أكبر حلم هتحققه...
لكنها موجودة
راسمها جوه لوح خرافية

الوقت عندك!
هو اللحظات اللى انت عايش فيها

العمر عندك!
رحله في سكه سفر
لسه انت مش متأكد
واخداك ولا مودياك على فين

الشعرعندك!
شعورك...
امرأتك..
عشيقتك..
اللي خانتك أحيانا..
الراجل الحقيقي فيك أحيانا...
المجرب منك أحيانا...
المستمر فيك أحيانا...
العاصي منك أحيانا...
القاسي فيك أحيانا...
هو انت يكل أدوارك...
يا عظمتك

العشق عندك!
فلسفه عمرها ما هتتحقق
غير لما تكون مخلص ليها...
غير لما تقابل نوع برى
غجري من الحرية فى حبك.....
غير لما تحرر روحك
من أسرك ليها
غير لما احتياجك
يبقى فخر لمعنى الإنسان فيك.....
غير لما العشق يملاك لدرجه الجنان....

دخان سجايرك!
محاولات مضنيه
علشان تحاول تسيطر
على بحر العواطف
اللى موجه هايج جواك

مكتبتك!
مكونه من الأصدقاء الفعليين فى حياتك...
خايف عليهم زى الساحر اللى جواه قلق
هل يا ترى سحره هيفضل حقيقي فى كل مره
لو حافظ على السر....

و مكانك ببوصلة قلبك
متحدد عالخريطة
أكبر حلم فى حياتك
ابتدى يتحقق
فاكر انه لازم ينزلك
جبريل علشان تصدق

كسوة الشتا


شوف بقى يا عم شتا..قصداك أنا فى أمر..فى غاية الأهمية...و مهمتك السنة دى...ما تخلى بيا..

شوف يا سيدى..صلى عالنبى كده...و استهدى معايا...مع ألحان فيروز فى الخلفية...و كوباية شيكولاتة سخنة هدية..و القمر تالتنا و عالنيل تمشية

شوف يا سيدى...مطلوب كسوة جديدة لقلبى!

لزوم يوم شتا من النوع المصرى....الصوف مغزول بايدين دافية...و اللون متحنى بحنية..و الوبرة تشيل القسوة معاها...لاجل جراح الماضى ما تروح فيها....و التفصيلة مقاس القلب...قلب كبيييير.......محتاج كامل محصول الصوف فى الأرض...و خيوطه أحبال وردية
من رحم السما مدلية...و الغرسة فيها دلع الدنيا....و الاحساس...آه مالاحساس..خليه روحانى آخر حاجة...و الموضة فى التفصيلة
موضة ما تعرف غير الأفراح...و الأحضان الرايقة...و الاخلاص

يا عم شتا...بأوصيك أنا عالاحساس...أصل الكسوة مش فى قماش و هدوم...الكسوة دايما احساس....و انتى يا دنيا...ليكى عجايب
ناس مالكسوة لابسين أغلى ما فيكى...و ناس مالكسوة مش لاقيين....و هما الاتنين مش فارقيين...الكسوة دايما احساس...جوا قلوب الناس

Release


ارفع كل حواجز الصوت
و سيب شدة أعصابك
تتسرسرب منهم

دوس على أبعد نقطة
فى الاحساس
و اضغط......
على كل حواس القلب

و أقطف من روحك لحظة...
فى أبعد حتة.....
فى قصة حب...
عشتها مرة

الحب كيان
عايش جواك
مهما كتروا جراحك
راح تفضل للشوق بتحن

و انزل بكيانك على كون الحرية
و فجر فبها كل مشاعرك
و ارسم منهم لوحة
.... سيريالية

و اطرح جوه زهور العشق
شمس شعاعها بيلمس وشك
عطر بيرسم نسمة نضيفة
أو بدر بنوره..
.بيسحب منك شحنات زايدة

باحبك و بس


باحبك فى صوت زقزقة العصافير
فى أول ساعات الصبح

باحبك فى لون الفجر
.. باحبك فى عيون الليل الجريئة

باحبك فى طعم الشيكولاتة السخنة
فى عز البرد
و فى طعم القهوة
اللى بتظبطلى صباحى

باحبك فى القمر لما يكون بدر
باحبك فى بسمة الهلال
و الربيع و الوان فراشاته الحرة السعيدة

باحبك فى صوت فيروز اما تقول حبيتك تناسيت النوم
و فى صوت ثومة اما تقول تعالى نعيش فى عيون الليل

باحبك فى كل كلمة صادقة تمس قلبى
و فى كل لمسة تلمس روحى

باحبك فى كل ضحكة صافية و بريئة
و فى كل نبضة قلب

باحبك من غير ليه و لا علشان
باحب الحب فيك و بيك
و باحب حياتى جواك و ليك

بأحبك
من غير حسابات الزمن
و لا دقات الساعات
بأحبك و يقينى فى انى
مخلياها عالوهاب الكريم

باحبك
و حرة فى حبك مش أسيرة
بأحبك...وده الأهم
بأحبك و أى شئ تانى مش مهم
و الأهم....انى...
باحبك و بس

الى حبيبى

اهداء الى حبيبى الذى لم يأتى بعد..الى حبيبى فى مكانا ما بالعالم...بأهديلك قصيدتى...أكيد هتحس بيها...حتى و ان لسه ماتقابلناش...عندى ايمان ان أرواحنا هتتعرف على بعضها اما نشوف بعض...و عندى ايمان أكبر ان ربنا بيدينا على قد اللى احنا مؤمنين بيه و أكتر كمان..علشان ربنا كريم..

فى يوم شتا برده شديد
اغزل من قلبى
....شمسية
تحميك مالمطره
أو بالطو حضنه يدفيك

و فى ليلة البدر هرب منك
اعمل منى قمر
يسهر وياك
و يونس لياليك

و فى يوم شمسه قاسيه عليك
اعمل منى ضليلة حنية
أو رشفة ميه
تتنعم بيها و تتنسم بيك
تسرى جوا عروقك نيل

و فى يوم ان جعت
اسحب من روحى
الروح......
راح تملاك

و فى يوم ان نفسك
أفلت كل أبوابها
من تعب الدنيا
اعمل منى....
ميت مليون مفتاح
أو ميت مليون دعوة
تتفتح بيهم كل أبوابك
أو بوسة روح
تروى كيانك
بحلم جديد
بيدفيك

و فى يوم ان شغلك اخدك منى
اوعاك تقلق .....
اعمل منى ورقك و أقلامك
او حتى مكالمة عاطفية
أرسملك بيها
على شفايفك
بسمة عفية
أرسملك فيها ضحكة
تهز القلب و تصحيه

و فى يوم ان خنقتك الدنيا
أو حتى زهقت أو مليت
اعملنى جناحات للحرية
رفرفرف...طير
فى سمايا بعزم ما فيك

ارسمنى بكل ألوان الكون دافية
اعمل منى النور
او حتى نجوم الليل
اعمل منى البحر
و كون انت البحار
اعمل منى الصدق
و كن له أعز صديق
اعمل منى صلاتك
ما أنا قبلتى فيك
و جنتى بيك

اسمع فيا الحان البهجة
على كل مواسم عمرك
خلينى رحيق المسك
ريحة العطر
فى كل زهور الكون
ارسم..ارقص
ارضى..وعيش
طير...و اتهنى
حُبك حُر
و روحى فى كيانك حرة
راح تطلب ايه تانى الدنيا
غير احساس عالى
بيا و بيك....

راح تطلب ايه تانى الدنيا
قلبك بيحب بجد
معشوق من جنية بحر
الهامه من قلب ملاك
من ضلعك رَزَقك بيها الوهاب
بجنانها ترفرف..و تِدَوب فيك
أحلى معانى الدنيا
أغلى معانى وجودك
الحب بفطرة سليمة
فطرة حبى رحيمة
تعشيقة روحى فى روحك
راح تطلب ايه تانى الدنيا معاك
قلبك بيحب بجد....
انسان عن حق
و بكل جدارة انتا فى قلبى بتتحب

كلام السكات..


سكات الليل...كلامه كتير
و سكات الشوق...فى القلوب
...كلامه أكتر..
و الشوق مشوار لحنين
و الشوق لحنينه نصيب
ساكن جوا قلوب...
و على قد ما قلبك يكبر
نصيبك مالشوق بيزيد

صوت السكات ويا الصحاب
من صوت السلام فى قلب الحمام
روحين بسكاتهم سكنوا فى روح واحدة

و السكات ماشي بسكات
شايل حقيقة كل اللى جاى
و اللى فات
و أنا كل ما باسكت
روحى بتكبر

كان أملى...فى حضن يسد معايا
يوفى و مايفوتنيش
كان أملى...فى حد فى سكاتى معاه
يفهمنى و ما يبعنيش...
.... ........لوحدى
و بأقول السكات أحسن
لوحدى........
باسكن على ورق الشجر الناعم
و اسافر على لون القمر الكامل
و ابدر على كون الليل اللولى
نور من روحى اليك
و ارسم عانجوم السما
مشاوير...مراسيل
و تعبت أنا مالشوق
و تعبت أنا مالمشاوير
لوحدى...
و بأقول السكات أحسن

عكس التيار

على شط البحر
غرست قلبى فى الرملة
و فرشت حصيرة الليل
و بدرت نجوم السهرة
بشراع الروح هوا مجروح
و سفينتى من غير مينا
و لا مرسي.....
كان نفسى فى شمسية حنية
ترقص ويا شعاع الشمس

نقطة مطره لمست جلدى
و الليل مقاسات و مراكب سايره
و بحر الحب مالوش اعماق
و اللى يطول فيه يبقى غريق

حبات الرملة بتدلع
و ملح جراحى بيوجعنى
و اللى يعدى الليل بشراعه
عدى البحر و لا اتبلش
عدى الليلة و لا استناش

عالكورنيش حبيبين قاعدين
على قلب هلال..متعلق بين ملكين
قاعدين على كتفى و مش حاسين
قاعدين يتسامروا بشمسيات
تحميهم مالمطره فى عينى
اللى رماها الهوا على بُعد
قاعدين يتسامروا فى الاحساس
و الاحساس ضليلة الليلة
و ضليلة الليلة حنين معقود

فوق الرملة قلوب مجروحة
و تحت البحر ارواح دافية
عالم تانى فى خيالى
و انا اصلا من عالم سابع
كائن بحر و له قلبين
قلتلهم ما انا عندى روحين

حبات الرملة بتدلع
و المطره نازلة بحنانها
و موج البحر بيخطفنى
و يرمينى عالشط القبلى
فى صخره فى جوفك عاجبانى
مليانة تقاسيم ربانى
و مع انى اتعلمت العوم
موجك يا حياتى عالى عليا
مهما بأشب مباطولهوش

سمكة فضة خايلانى
بتشاغل فيا استسلامى
لفتت نظرى بصنارة
غمستلى بعينين عسليه
قولتلها انا بحرى غميق شعنون
و انا البحار و انا المجنون
و بابحر ويا التيار
و التيار من هوى ممنون
و سفينتى لؤلؤ ببدور
جوا قلوب بتعيش عالنور

مجاديفى جارفة فى موج غالى
و جاروفى شايل مالناس
اعلى اوتارهم فى الاحساس
و انا انفاسي ناقصة ايقاع
اتارينى باجدف عكس التيار
و اتارى الشط على بُعد انهار

توريطه و تحويطه

توريطة و تيتا و عالية و على سيكا
نهاوند قانونجى بيعزف ناى
فى قلب بيعشق فى خريطة
مرسوم فيها يجى ميت شخبيطة

شخابيط لخابيط تتفعكش فعاكيش
طبلة و بترء و كمانجه و عود
عود أخضر مزروع
طارح نخلة بتقول مواويل

صبابة ربابة تصب جذور
تضرب فى الأرض و تثبت...
راح تطرح بساتين
جوا عقلى اللى اتجن
مالوحدة فى عز الزحمة
مالغربة فى عز البيت
نفسه فى ضليلة حنية
تتسقى بدلع عالريق

تحويطة من ناس حيرانة
من بواب مش لاقى عمارة
من فلاح مش لاقى الغيط
أو شاعر مش لاقى قصيدة

تحويطة من جرح قديم
متقمص دور عفريت العلبة
كل ما تنجح تقفلها
تكتشف انك....
طلعت عبيط...

توريطة فى ناس زهقانه
مش لاقبه حبيب و لا شغلانه

توريطة فى ناس
من كتر جراحهم
بيجرحوا فيك
من كتر ليالى وحيدة
بيرموا حمولهم على ضهرك
بدل ما فى يوم......
يقابلوك بأحضان تشفيك

توريطة فى واحد حب مطالشى
تحويطة من واحد أو واحدة
حبيتهم يوم و خانوك

تحويطة من واحد
غالى عليك
باعك بقليل
فاتورطت معاه فى البيعة...
و مبعتوش....!!

توريطة فى بلد خربانة
من ناسها اللى قلوبها بتكدب
و برغم الحالة...
لسه بيجيلهم نوم بليل!!

تحويطة على قلبى
الحزنان
مع انه بيضحك وياك

توريطة فى معنى الانسان جواتنا
اللى لسه عايش بضمير

شيزوفرينيا الأنا

أنا بيت التقاء الشمس بالقمر
أنا لحظة لؤى العشق بجسد الحبيب
أنا كل البريق فى لحظة سقوط شهب
أنا السما فى غروبها و شروقها و برقها و رعدها
أنا الليل فى عز سكونه و ضلمته
أنا الألم و الحزن و الشجن فى نشوته
أنا اللى جوايا حب يكفى قلوب كل البشر
أنا اللى بأحب الناس و الحياه بدون مقابل منتظر
و ساكنه جوايا أفكار تكفى كل مخططات القدر

أنا اللى فى عيونى مدن و أوطان و سكن
كلهم من غير خارطه و لا حتى زمن
أنا اللى فى كل سجده لربى روحى بتتغسل

أنا اللى سهل أتفهم
بس لسه صعب أتفهم

أنا اللى فى الليل بأداوى غربتى
أنا اللى فى السهر بيتولد جوايا نغم
وكل الجنون فى عزوته

أنا قصة حياة الاحتيار أمام الاختيار
أنا أستاذه ضليعه فى تغيير الخطط
وفقا لمناخ القلب
و تضاريس الإحساس
و حساب الانسانيات

أنا قصة الهروب من الجراح
و التكبر عن النضوج
...اللى بيحاول يسرق منى الطفله
اللى بأشوف من خلالها دنيتى

أنا النسخه الأبيض و اسود
فى زمن الالوان المسخ
أنا موال على ربابه
صاحبها مالوش عنوان

أنا اللى فيا عرق صعيدى
بينتر ساعة الجد
أنا اللى بحرى عميق
و أمواجه طايشه و متسرعه
أنا اللى بأونس كل الناس
و مفيش غير الوحده تونس وحدتى

أنا أجمل ما فى الكابه
و أقوى ما فى لحظات السعاده
و أشجن ما فى الدموع لحظات الانهيار
أنا الفكره لحظة ما بتتولد
و القلب فى أول نبضة حياه

أنا المخرجه اللى بتخرج فى كل لحظه قصه من اختيارها
أنا اللى فى خيالى جزيره مش عالبوصله

أنا اللى مهما كان جوايا ألم ضحكتى من قلبى
و"مش مهم" برضه بأقول اللى فى قلبى

و مهما كان جوايا حزن
بأعرف من تانى للسعاده طريق
و دمعتى لسه فيها درس
بأتعلم منه الحياه

أنا اللى صعب أتفهم لأنى محور الاختلاف
فى زمن بيعيش على ملل التشابهات

أنا الفراشه اللى فيها روح أمها
اللى بتحيا عالنور و الحريه و الانطلاق
أنا حالة حب مستعصيه................

أنا اللى قلبى أصبح مكتوب عليه
"ممنوع الاقتراب"..."ممنوع الدخول"
و اللى يحاول يقرب
............يتحرق
...من عاطفية برج الأسد
.....و حرارة كوكب الشمس
.....و نقاء الزهره اللى بتعبده
و شيزوفرينية الأنا
....أنا كل التناقض و التناقض أصلا أنا

ماليش مداخل


ماليش مداخل
وأبوابى مالهاش مفاتيح
شبابيكى مبفتحهاش
ولا حتى باوارب فيها

و قلبى واصل شمسه
و روحى بتعشق ليلى و قمره
و نجمى دايما شاعر
بشعره بأعدى الليل
و أفلامى أبيض و اسود
و أتمزج بقصيده بترشق روح فى القلب
و بافهم دنيتى فى قصايدى

غجرية وحده أصيله
و جنانى العاقل فيا
عواطفى بحر و بركان
و جزيرتى من غير عنوان
و أوسع منطقه فى الكون
و صديقى هو كتابى
و أهلى..ورقى و أقلامى

ماليش مداخل
و محدش يعرف يملكنى
و صعب تقدر تعجبنى
و أسرارى مبفتحهاش
أصلها أسرارى لوحدى

صندوقها أصله فى بير
و بيره مالوش مفتاح!

أصل أنا من بره حديد
لكن من جوا ازاز
و دموعى نهر بيسرى
و نهرى أصله الاحساس
أصل أنا جوايا انسان
حيران....مصدوم
مجروح ...مجنون
غجرى لكن انسان....
صافى من عند الله
لسه ضميره نضيف
و أبيض بالقوى من جوا

و أنا فعلا أصلى فراشة
أمى سمتنى فراشة
أصل أنا يوم حره وسط الأزهار
و يوم متشرنقه فى حمايه
أصل أنا حساسة كبيرة

و ساعات خايفه من الدنيا
و بشرها أكتر ناس تعبونى
طايره هايمه و مش فارقه
و ماليش فى القعده البايخه
و صدقى بيسبق فعلى
و كلامى كله حقيقه

ماليش مداخل
و عيونى بوابه لجنه
صعب دخولها بسهولة
و محبش المجامله..
ولا الغزل الكداب
و لا راجل مش فاهم نفسه
و لا واحده بتلعب بأنوثه
و لا ست بتحرق فى تحرر
ولا انسان مش صادق مع نفسه

ماليش مداخل
وأه بأسمع قرآن
و ثومه و فيروز و حليم
و بأحب القهوه مظبوطه
وماليش فى الحال المايل
ولا حتى الأى كلام
و جدودى بدعوا أصول
دغرى...لا بتمط و لا تطول
من منصوره لأسيوط لسوهاج
آه يا بلدى ما أحلاك

ماليش مداخل
أبويا أعز أصحابى
و أصحابى بجد قليله
مبيفرقش معايا أعدادهم
قد ما يفرقوا بأفعالهم
و قد ما يفرقوا فى القيمه

ماليش مداخل
أصل أنا حساسه كبيرة
عايزة ريشة فنان
أنا سر فى وحى الالهام
و حكايتى فبها من كل الألوان
و لوحى بأرسمها بوهيميه
بس حره و أسيره!

ماليش مداخل
عايشه الدنيا للآخره
عقلى سلامه فى نوره
و قلبى ده عايزله قضيه

سكران فى البار


قلبى بقاله كام يوم سكران
باينله عايش فى البار
و البار دايما صاحبه غضبان
و زباينه مجاريح فى طريق
وطريقى كل ما باوصل بيطول
و الطول فى العرض مقاس
مقاس.....أنا مطلعتوش
أصلى مقاساتى كتير
ولا واحد منهم ظابط فى الاحساس

و أنا قلبى دمه تقيل
سكره مابينفعنيش
أصله على طول حيران
على بابه علامة استفهام

و الدنيا سؤال و جوابه سراب
و الحب وهم فى بير
و البير غدار و ماله قرار
ازاى الناس ميتفهمنيش؟

لغتى أصلها احساس
والاحساس اصبح فى قلوب الناس كداب
تعدية الشارع ظلمانى
أنا هأمشى عالجنب التانى
و أشجعكوا ميخوفنيش
دنيتكوا ضايقة عليا
و أنا قلبى يساع الناس و الكون
مع انه كتير ما بيسعنيش

تقسيمة شوق

تقسيمة شوق
على تنويحة خريفى
افتحلى عالبحرى
و قسملى تقسيمة خريفى
و رد الروح من شباك مجروح
و غنيلى فى العشق أغنية
و اقطفلى مالسما نجوم
تكتب فى القلب قصيدة
تعزف على أوتار الحنية
و تزرع بيهم ضليلة
.....للعمر.....
يعيش فيها ساجد للحرية

كان ساكن جوايا حنين
لوشوش و أسماء و سنين
كان فاضل جوايا أشواق
لسلامات بتبل الريق
لسكن يرتاح فيه صوت الأنين
كان عايش فى أيامى حب قديم
......لحب جديد....
أنا مش لاقياه....

أبيض و أسود مبقوش فارقين
راح تعمل ايه الألوان
جوا عيون انسان....
بيشوف الدنيا فى شريط
بيكر و من غير تحديد

راح تعمل ايه فينا الدنيا ؟
و هتاخد مننا مين؟
طب ايه يشفى قلبى السكران؟
من حب أنا مش لاقياه
من حب مقاسه كبير
من حبه اللى بينداس
من أحباب من غير عناوين

يا أصحاب الأحاسيس العالية
يا أصحاب البدر فى يوم عيده
يا قلوب هادرة بأمواجها
ويا طير فارد جناحاته
و يا ضحكة طفلة شقية
فاهمة الدنيا ببراءة
عايشة عالحاسة السادسة
و فطرتها عفية....

راحت فين مالدنيا
أحلى أيام عمرى و لياليا..
راحت......؟
... و لا لسه جايه؟

لسه مبصدقش!

ازاز مكسور
و قلب حياته جوا قصور
و القصر بيوت فى ضلوع الصدر
جوا انسان بيحب بصدق

شوارع ياما تهز الكون
و أنا ماشية بعمرى عكس عكاس
فيضان بشرية...عايش...
على قوة دفع..بوقع الزق...
قطيع متجمع عالخوف و الجبن

بيقولوا الدنيا مقاس كداب
صح..غلط..ليه...علشان
و لسان الناس عايش مزادات
و فى كل مزاد جرح لانسان
ناس بتخوض فى أعراض ناس
كان نفسي أعيش و لا أصدقش
ان فيه ناس وحشة بجد؟؟

كان ياما كان
فى مكان..فى زمان
بكتاب عايشين..بكتاب هنموت
حواديت و بنكتب
فى تاريخ...
فى طريق.....
آخره حساب...
و فى نصه...
كراسة رسم
فيها ياما مشاهد
أبيض و أسود
و ساعات ألوان
الدنيا كتاب..
لوجوه...لنفوس
بكلام معسول
فى وعود بتقول
وبوش بتكدب
و بوش تخون
و بقلب بتظلم
وبقلب تسبح
و بنفس القلب ده برضه تبيع
كام قلب ملكتوا؟
كام دور عايشين؟
كان نفسي أعيش و لا أصدقش
ان فيه ناس وحشه بجد؟

سحابة فى قلبى

سحابه محقونه بمطره
بتمطر جوا عينيا
فضلت أغالب فيها
يمكن مداريه فى شمسى

الرعد ليه بيزلزل
كده من جوا فى قلبى
فيه احساس أتقل منى
عمال بيشد فى روحى
بيخلص على أنفاسى
و كأنى هيجيلى ذبحه
و كأن الجو ملوث!!

عندى حالة وحشه
لحاجات أنا مش عارفاها
و نفسى فى حضن ربى
أرتاح أنا فيه و أدفى
طب نفسى أرجع من تانى
انسانه سعيده و متفائله

لكن سايقه العربيه
و بابص فى المرايه
وكل ما بتتقدم
اشخاص الماضى بتبعد
وكل ما أبص ورايا
يقابلنى طرف عينيا
جوا مراية العربيه
أشخاص الماضى بتصغر
و الماضى عمال يتلاشى

و انا عايزه اصحى من النوم
بس أنا مش عارفه أنام
و هانام ألاقيها والعه
اصبح الاقيها رماد

و صحيت من تانى لأيامك
من تانى يوم من أيامك
بأهرب فيه من الذكرى
بأهرب فيه مالوحده
وأنا طول اليوم بألف
الوحده ليه مهاجمانى
و فى قلبى ليه واجعانى
أنا أصلى بأحب بعنف
أنا اصلى مابتعلمش
وليه أنا خايفه عليك
طب ليه أنا هنت عليك
مع انك غالى عليا
طب ليه أصلا صدقتك
و اشمعنى انت بالذات
دونا عن كل الدنيا

زمان....
كان قلبى بدقاته
بيعلن حبك حرية
دلوقت بتعلن دقاته
خوف...........
من كسرة قلبى الكبرى
و من توابعها العظمى
و امتى هانسى بجد
و امتى هأمحى آثارها

وده ربك رب قلوب
ياللى انت بتاع احساس
وأنا عايشه بالمقلوب
من يوم ما وعيت عالدنيا
أنا بأحلم ألاقى عنوان
لمحل صيانه ربانى
متخصص شافى جروح
طب بأحلم الاقى كتالوج
لقلبى أبو حال معووج
أو خياطة تاخده كام غرسه
أو ترزى بتاع رفه قديم
فاهم جدا فى الصنعه

عربيتى غارزه فى الرمله
مهما بأحاول اطلعها
و فوقت لقتنى فى شارع
ماشيه فيه بالمعكوس!

أنا الحقيقة!


طلعتلى فجأه فى المرايه
و بصتلى بمنتهى الغرور

و قالتلى بصوت عالى مسموع
"أنا الحقيقه!!
شايفه الدنيا بنص نفس
قلبك دايب متهتك فى سكة أوجاع
أحلامك مشروخه
توقعاتك مصدومه

النوم عندك اصبح حالة هروب من الأفكار
فرصة جديره..للنسيان..التناسى
و الحياه مشاهد متكرره
و سكك معكوسه
و لا سكه منهم وصلتك ليا

مع انك بقالك كتير بتدورى عليا
أنا الحقيقه الباقيه من كل اللى فات
أنا الحقيقه الصامده من زمن العجب و الخرافات!!
تحبى تتعرفى عليا؟؟؟

ديسمبر الحزين


ديسمبر الحزين
صباحه يتيم
يدفى بقهوة سادة
و ليله مجذوب وحيد

و القمر جادل ستايره
و النجوم عليه مدلعين
و السكون صوته
شجن.....أنين
دموعه فايره فى العروق
و ذكرياته قتال قتلة أصيل

مشهد انتحار
لحن تأبين
لجزء من انسان كبييير
فروع الشجر عريانين
و الناس ليه متكفنيين
فى بلاطى سوده سادة

مشهد فراق
مشهد وداع
قبر انحفر
على صوت مقرئ فقير
و الفقر عنوان شعبك الحزين
يا ديسمبر الحزين

صوت أنين غزال
فى النشرة اعلان
عن سفاح ملايكه
عنوانه مفقود بين السنين
أطراف الصوابع
على قلبه المدبوح
تحت الجاكته متخفيين

يا ديسمبر الحزين
ذنوبك سكينة تلمة
عالقلوب البردانة مكتوبين
سحابك ليه بالدموع محقونين

موجة عالية
تحت الرمل راسى منها
زى النعام مستخبيين
قلبى واقف سكران
بس عامل... قال ايه
قال..شجييييع!
لابس بدلة تحميه
من رصاص قدر
شفايفه مبتعرفش تضحك
فى وش زمن قلبه مات من سنين

يا ديسمبر الحزين
وصيتى ليك...خليك رحيم

و فى لحظة حسيت..


احساس جديد بيتولد...بالزمان
احساس جديد بيتولد....بارواح ناس

احساس فيه ناس ماتوا
وناس فى حالة الانعاش
ناس بتموت......
وناس لسه فى طابور الانتظار

احساس كان يوم برئ
دلوقت أصبح غريق

بيستخبى بعدوانيه
من كتر ماانجرح من بشر
و اندبح مالكدب و الخداع

وشوش بتحاول تعمل بريئه
و مشاعر بتدعى الأمانه
و ايدين بتكتب قصص للجراح
جوا قلوب رقيقه

احساس ضاع منه الأمل
احساس فيه أنين
غربة كل مكان
و شجن كل زمان

احساس ساعاته بتدق
فى توهان
احساس مالوش طعم
و لا له فى الألوان

زى فزعه فى نص الليل
من كابوس طال
او خبر مؤلم
يدعى الانهيار

احساس بيقول ان الحب خدعه
و الحياه كدبه خاينه
و البشر قمة الارهاق

احساس تايه فى سكك مالهاش نهايه
و طرق مالهاش بدايه

احساس مالوش بيت..
يتيم.....
و خايف من كل الأحضان
خلاص مبقاش يصدق
أى دور من الأدوار

احساس هروب سجين
لسجن أقسى من اللى فات

لحظة سلام

بأنام عالقبله
و أتشاهد قبل ما أنام

قالولى ده تدين؟
قلتلهم
ده استسلام

قالولى خايفه تموتى؟
قلتلهم
ده سلام
من كل شرور الدنيا
و كل شرور الانسان

الاسم وحيدة

اسمى وحيدة
عبد الواحد
ابن العم وحيد
بيقولوا فى الاسم نصيب
قدرى أشرب مالوحدة
و لا حتى أبل الريق
أصل الوحدة بتاخد
وتفضل تاخد و متدييش
أصل الوحدة وحيدة محتاجة لانسان

الشعر و قلبى و بدر الليل
على شط البحر....
غارزين فى الرمل
على سطح الموج
فى سفينة بشراع
بحارة فى طريق

فى رحلة حروفها بتغزل
عمرى بحاله
و حاله ...
مهما اتلون بقلوب
يرجع للوحدة....
و كأن الوحدة نصيب

ورق الشجرة
الواقع من جذعى
فيه فى جذوره شئ بيفكرنى...
بحب قديم
بجرح و فات..
عمره ما مات
فى حنينه متاهات
صحبة وعدت
صحبة وجات
و أنا قلبى مخون
ياما حاجات
كانت يوم مالايام
أحلى حاجات
فى العمر بحاله
من مولد لممات

و أنا اسمى وحيدة
و قدرى وحيد
محتارة أنا فيك يا طريق
مهما حاولت أبنى في زمانك
تيجى الموجة و تمحيلى فيك

قضيب القطر..طيارة ورق
طير مهاجر..طير يعود
بالونة طايرة بين السحاب
مشاهد وحدة ..أكيد
وحدة تتبدل بوحدة
و غربة ماليه الطريق
و الخريطة متقسمة بالنصيب

قلبى مزادات احساس

عصافير بتغنى ليل و نهار
فجر الحب بيسرى
جوا الروح أنهار
و أنا ادوق الشهد
من رمش عيون الكون

التوت ملتوت
على فرع أخضر
مش مهجور
و أرضى فى روحك خضره
و العشة ساكن فها روحين
صحيوا فى ليلة بقوا روح واحدة

و أنا قاعدة لوحدى باستناك
على مرحيحة قلبى الحيران
مش فاهم ازاى احساسه بيك بيزيد
مع كل عذابه وياك

قلبى مزادات احساس
اتلموا عليه الاحباب
و برغم ان احبابى كتير
فيه فى قلبى فراغ
طعم الوحدة بيملاه
مين عارف ايه و لا مين راح يملاه؟

سكر بودرة


سكر بودرة على كادر حنين
طعم القهوة مظبوط
بن محوج بالحب
جرنال الجمعة الصبح
صاحى ويا الشمس
قعدة بلكونة حريمى
متسقية بطعم الضحك
فيلم أبيض و أسود داير
على عين عم ياسين البقال
و الجبنة التركى تسيح
جوا فينو الفرن السخن

الوحدة أعز صديق
و أوفى من أوفى الناس
و حتى الوحدة يا قلبى
حاسدينا عليها العزال

أنا بأطلع زى شعاع الشمس
و أتخفى بقمر الليل
و بأعد نجوم السهرة
و أسمع ثومة بحنين
و أدفى بورقة شجرة
سابهالى صديق انسان
جوا كتاب العمر
و أفرح برسالة فاكرانى
مش هأنسى الحب لا ينسانى
مهما نسيونى أصحابى
و مهما نسيوا الأحباب

نخل و سما صافية و قمر و ألف نجمة منورين

نخل طارح فى العلالى
جذوروه ضاربة فى الدروب
شرايين الدم صافية
ليه بتحاولوا تعكروه؟
الأرض ديه جذورها روحى
متعلقة بين الضلوع
نفسها فى نفس نضيف
يخرج من أعماق الضمير
يخرج يريح...من جوايا
ميت سؤال و ألف ليه؟

السما انهارده صافية
مراية عاكسة بعد
أبعاده حتة فيا
حتة فيا فى الغميق
راكن فيها أمنياتى
جنب أحلامى و حروفى
و ملامحى اللى سابتنى من سنين
راكن فيها صورة
لحب يملا جوفى
يهز فيا الكيان
يضخ شريان الحياة

السما انهارده صافية
أكيد الدعا مستجاب
كل دعوة ضى قمرى
و القمر الليلة دى صاحبي
بيصلى فى قلبى الوحيد
معبد مجروح مالبشر
جراحه قسوة سنين
فى التاريخ مترشقين

القمر.......
بيلمس ايديا الممدودين
بألف دعوة مستجابة
لكل خطوة بالاجابة
بتشق الطريق فى السنين

و السما انهاردة صافية
و كل دعوة ليها زفة
بألف نجمة منورين

تعشيقة الروح

فى الحب و التعاشيق
فى المغنى و الطقاطيق
فى روح الليل نسجت انا
من روحى الف بدر فى ليلة عيد

على لحن عصفور الجنينة
شقت عنيا الضلام
اللى انكسى بتوب نور النهار

مع كل نبرة ادان
قلبى بالدعا يدوب فى رب العباد
و من عباد الشمس....
فرشتلك انا قلبى بستان

و اللقا بالسكن نصيب
و النصيب ما بين اتنين له اوان
كما كل شئ بميعاد
لا يعلمه الا رب العباد
برحمته يطلى القلوب بلون الربيع
يصبح الم الفراق اجمل من شجن الخريف
و امطار العيون بترخ فرح
يبرق شعاع الشمس من قلبها
و يشرق بالامل.......
و انا أملى ايه غير يقين باسمك المجيب

امر القلوب من تدبير العظيم
لا ليه و لا ازاى و لا شئ مستحيل
ده حتى حرام
ان كان ايمانا أكيد

فى رحلتى انتا الوصول للبداية
و انتا اللى باتمنى فى رضاك النهاية
بالحلو فيها و المر منها
على عهد الحب متفقين
و بالنصيب و القدر راضيين
و ايه اقولك غير لينا رب
فتاح عليم رزاق كريم
و من رحمته الحكمة فى النصيب
و تعشيقة روحى فيك
و روحك اللى سكنها فيا
و ايه يكون ده يا حبيبى
غير جميل يا حبيبى
و ربك جميل

قرار من غزل البنات قرار سكر نبات


من كل أشكال الدنيا أنا شوفت
مرة شاركت.....و مرة بعدت
مرة احترت.....و اتأملت
لكن فكرت.....مرة اخترت
مرة جرحت....عن دون قصد
مرة بكيت....و مرة قسيت
لكن اتعلمت

أنا انسان فى ضلوعه ليالى كبيرة
مولد زفة هيصة و طنطيطة
أفراح مواويل على حلقة ذكر
و قلبى لابس تنورة
بيرقص بيها و يلف
من كل ألوان الطيف
من كل عطور الزهر
عمال بيفيض عالكون

أنا انسان بيحب الضحكة ترج القلب
بيحب الفرح فى كل أوقاته
بيحب الحب لأنه الحب
أنا انسان طلباته بسيطة
ترضيه كلمة رقيقة من جوا القلب
ترضيه بسمة روح مرتاحة
أو كوباية شاى بحليب
مع بمبو جاياله هدية!!

يرضيه يعرف انه حقيقى مميز
جوا قلوب بتقول الصدق
أنا انسان عايش عالفطرة
و دى فطرة سليمة بجد

أنا انسان أغلب من الغلب
مش عايز غير استقرار
و شوية رحمة و حنية
دلوووع....لكن بيسد

يرضيه قعدة بين قلبين
اتصاحبوا فى حب الله
عالبحر بيلعبوا فى الرمله
و بياكلوا فريسكا و سودانيه

أنا انسانة بسيطة بجد
تعمل ايه طفلة برئية
فى دنيا جديدة ماتفهمهاش
اتجرحت جرح دموعه كتيره
يا دموع عينى غالية عليا

أصل أنا انسان راح بقشيش
بس أنا انسان بيحب بصدق
و الصدق صديق بينجى أصحابه
وأنا قررت....
و فين كان غايب عنى قرارى؟
أنا هأتحدى أسوار الحزن
هأضحك ليها بعزم ما فيا
تضحك ليا..
هأحلم و أغزل حلم فى حلم
هأرقص فى الهوى
و يطير فستانى
و ترفرف طرحتى بشقاوة
و تغازل وشى و تقاسيمه
و تطبع بوسة على شفايفى
و على خدودى..الوردية

هأعيش و أفرح تانى و أتحب
أتحب بجد....أتحب بصدق
أنا هأرجع تانى أغنى فى كل مكان
مزيكا دايرة فى دماغى فى كل الأزمان
هأفتح شبابيك الروح
و فى قلبى شايلالك بيت
ريحته عفية ترد الروح
أنا هأرجع تانى لتمشية النيل
و هألعب تانى ويا الموج
هأرجع تانى أعيش فى ربيع
هأرجع تانى قلبى شجاع
بمبى بينبض فرح فى فرح

طز يا دنيا فيكى و طز
طز يا دنيا و طز الطز
طز يا دنيا و طز بجد
ان ماتصانت النعمة تزول
روحى يا دنيا بلون الحزن
تعالى يا دنيا بلون الفرح
أحضانى مفتوحة بشوق معسول

الأربعاء

ورقة شجرة

ورقة شجرة
بس الشجرة
جذورها بعيد
و ازاى انسان هيعيش؟

عين بتشوف
من غير القلب
و ازاى النور راح يوصل للشوف؟

دنيا و ماشية بالمقلوب
دنيا و دانية بناسها الدون
ظلم بيعدم للمعدوم
و دايره و بتلف و ما بتدوم

عمنا كلنا

على عربية ترمس
أو على عربية فول

جوا بقاله قديمه
أو جوا محل عطاره

بيحمى عماره بسكانها
أو حارس على أرض و غيط

بيسوقلك أى مواصله
أو فكهانى عالناصيه

عم زيدان بن عم احمد
بن عم العم سمير

شخصيه مهمه فى بلدك
شخصيه ليها تاريخ

عمرك فكرت فى يوم
بيناموا فين بليل؟
طب عمرك مرة سألت
أرزاقهم عامله ازاى؟

طب عمرك اتأثرت
على عم سعيد اللبان
لما انقطع..
فى مجيته عالبيت
طب عمرك مره بكيت
لما مات البواب

أحلامك أوامرهم
و غلابه و طيبين
وأكيد فيهم انواع
بس الغالبيه العظمى
من أصل الأرض
و من اصل الطين

ان قدرت!

ان قدرت توصل للحقيقه فى المنام
أو حتى فى عز الضهر و الزحام
تفتكر عمرك يتباع بكام؟

ان قدرت تعيش فى عزله
أو حالة وحده و توحد بالمناسبه
تفتكر ايه فيهم هتهوى؟

ان قدرت فى يوم تبيع
ان قدرت فى يوم تضيع
أو حتى تنسى أو حتى تقسى
تفتكر ايه اختيارك؟
ومنين هيجى احتيارك؟

فكر كويس فى الاجابه
ده كل ورقه فى الحياه
يتلعبك
راح تحرق وراها تمنها
فكر كويس فى السؤال
مكانك فين جوا الاجابه
ده من الأصل ده ان كان لك مكان

فلاح

عايش فلاح طول عمره
لابس جلابيته فى أرضه
زارع نخله فى بيته
ضليله عليه و لعيلته

عايش فلاح طول عمره
بيقضى يومه برزقه
شايف الدنيا ببساطه
و ضميره صافى فى نومته

و طموحه الأرض تنبت
توته و ملتوته و سنابل معقوده

عايش فلاح طول عمره
ايديه سبحان الخلاق
شاهده على عرقه و رجولته

بشرته ملفوحه بشمس بلاده
نحاسيه فى صباحه
و دهبيه فى ضوء لياليه
السهران فيها مع قمره

تحت عينيه ضى أبيض
بيقول.... أنا راحة البال

و عيونه بتحضن فطره و براءه
و الخير خارج من قلبه
و بيعبد ربنا من قلبه

يا ترى ايه راح يطلع حلمه؟
أنا أصلى بأحلم أبقى مكانه
و أغير حتى زمانى.... لزمانه!


** فلاح شوفته فى اشارة مرور...و هذا سيداتى و سادتى كما قال لى أحد أعز الأصدقاء الجانب الايجابى فى اشارات المرور فى حياة الشعراء!

دور البطولة...دائما مرهق

كل واحد فينا بيلعب دوره عالمسرح
كل واحد فينا بيحاول يرضى جمهوره بطريقته
و فينا ناس بتحاول ترضى المخرج الأعظم
و ناس مالهاش أمان

و فينا تاس تدخل بيوت ناس
ناس تصون و ناس تهون عليها العشرة
و فينا ناس تعيش فى قلوب ناس
ناس تخلق جواها دفا
و ناس تكسر فى القلوب
كلها أدوار....

قالوا اللى بيشعر بالمشاعر شاعر
و قالوا اللى حاسس..حقيقى حاسس
صعب يجرح فى المشاعر

والقسوة دايما من قلوب جريحة
مش عارفة تسامح نفسها عاللى فات

و الاختيار دايما تمنه بيدفع على انفراد
و الماضى باب لازم يتقفل
يتاخد منه الحكمه
و يتحكم بالموت على باقيه

الغدر زيه زى غدر الجو الانجليزى
فى لحظه شمس و لحظه رعد
و لحظه تانيه
عامل زى الكوارث الطبيعيه
و يخوف زى التسونامى
بيدمر أى حاجه حلوه
قدامه و حواليه

و قبل ما ندور
عالراحه....عالدفا....عالحنان
هما فين منا و فينا يا زمان

نزوة سادة

العنف فى كل لمساتك
أكبر دليل على أنانيتك

انت الحياه عندك نزوه و بس
بتعامل الدنيا زى زاحده ست
و بتبرر كل شئ بشهوه
مره ساده
و مره زياده
و مره عالريحه
بس نادرا ما بتظبط معاك

و لأن الدنيا عندك واحده ست
فانت برضه شايفها مقاسات
فمره عجوزه
و مره شابه
و مره مش فاهماك
و مره مش فاهمها
و مره عايش فيها
و مره عايز تسيبها

و ساعات تكون فيها الجدع
و ساعات تكون فيها القتيل

و الستات عاملينلك أزمة
و الرجاله كتير ما ليهم لزمه
و البنى آدميين عندك
بلمفات و وفى كل ملف
ليك حكايه بتحبكها بشطارة

تمثيلك فى التضحيه بقى مبتذل
ده اختيارك.....عيشه بهدوء
و اعرف ان فى يوم
لو اتزنقت....هتختار نفس الاختيار
لأنك دايما محتاج....لاستراحه
تكون فيها لوحدك
ما بين فصول المسرحيه!

تفتكر حياتك أنهى فيهم؟
وهم و لا سراب ولا نزوه؟

عشوائي

عايش على وصلة ديش مسروقة
......من فضا مهجور

و الانترنت جاى يزورك
من بيت جار...
.... مبتعرفهوش

و الشباك عندك دايما مفتوح
و بابك مش مقفول
و موبايلك حسب الموود

و الأكل...طقة فى اليوم
مرة كباب أو رومى
و مرة عدس و فول

مرة انسان ربانى
و مرة صعلوك مملوك

مرة حاسس بنعومة فى الاحساس
و مرة حاسس بغموض

عشوائى انتا عشوائى
عايش اليوم باليوم

جواك مليون احساس
جواك مليون انسان
و بتلعب كل الأدوار فى اللحظة

مرة فى قعدة شاى
مع عم سعيد البواب
و مرة بتشرب بيرة
فى قعدة كلها حريتة

و الستات عاملينلك أزمة
و عندك منهم بدل الواحدة
يجى ميت مليون حزمة
بس اللى فى بالك
.....دايما واحدة!

عشوائى عايش بالفطرة
و بتواصل فيها بالقدرة
و مش فاهم لسه عايزها ولا بايعها؟

يمهل و لا يهمل

عايش الدنيا بألاطه
بيبص عليها من فوق
و كأنه راكب طياره

و بيحلم يبقى أمير
و فى جيبه مفيش مليم
أصله غاوى استسهال
و عايشها حداقه و شطاره

و عاش وحده أسير أحلامه
فاكر نفسه مفيش زيه
أصله تعليمه خواجاتى
و أهله مالعيله المالكه

و فى سكه مليانه تكبر
على خلقه و على ناسه
عرف انه اداس بمداسه

شاف الحب كتير
و قال انا عمرى ما احب

حاول فى الشغل كتير
و لا عمره ثبتله أرزاق
و لا عمره ثبت فى وظيفه

دارت أيامه و لياليه
و تزعم دور عزوبيه
و عاش عالوحده و الغجريه

كبر الشاب من غير شابه
و شابت أحلامه معاه
و الوحده بتقتل فيه

لقى نفسه وحيد فى الدنيا
و لا مال و لا جاه و لا أى عزيز

أصله حصد المحصول
اللى كان زرعوا فى قلوب
قام رجعله فى آخر ايامه
قسوه ووحده و ضياع
حسبته طلعت بالناقص
و عاش فيها محسور
حاول يرجع انسان
بس لقاه جواه
كان مات

كرسي فى الكلوب

وقفت طفله بريئه
انسانه بكل جوارحها
تتفرج على أبشع مشهد

ابشع مشهد فى السيما
مشهد محبوك فى درامته

وفجأه فوكس على خدعه
فجأه زووم على دمعه

البطل طلع مفاجأه
البطل قتل البطله
وهى بتتفرج كبرت
أيامها سابتها بسرعه
والشعر الأبيض بان
بيقول أنا ظلم الانسان
لأخوه الانسان
اكتشفت زيف الدنيا
ولسه بتعرف حقيقتها
لما راحت كواليسها

تحيا الحياة

تحيا الحياه فى دنيا العجب
و صوت السكون فى لحظة نغم
ماشيه أسيره فى سباق الزمن
بتحلم بلحظة وصول عدن

تحيا الحياه فى مغامره
و تحيا الحياه فى لحظة شعور
بتغرق فى الاحساس

تتغير المناظر....تتغير الألوان
و يمكن كمان الأسماء...و نوع الانسان
بس يفضل هوا هوا نفس الكلام

تحيا الحياة فى رحلة سفر
منين جايين و على فين رايحين
الاهم فى السكة ايه عاملين
ما احنا مهما كان مش قاعدين

مع سبق الاصرار و الترصد

دايما فى لحظة احراج زيادة فى الأسانسير
و الشوارع بأمشى فيها غريبة
و الناس من غير هوية
و أنا بطاقتى ضايعة من سنين

مطره نازلة ترخ
من وقع تكييف قديم
صوت الآدان فى الزحام بينده عليا
دعوة مفتوحة من رب العالمين
أرتوي فيها من روحه نور...

وسط صحرا من البشر...
تخلو مالحنان و الحنين
تخلومن كل معانى البنى آدميين
حتى الأمل أصبح سراب فى مدينة كبير

عزمت واحد صاحبى على حلمى
!قام باعنى و طلع أصيل
ليه الناس دايما بيضغطوا
على مسام الرحمة فيا
طب ليه ما عاد كتير
يفهموا فى الانسانية
مين الجدع؟؟....مين الجدع صحيح؟
و البطل غاب جوانا فين؟
و ليه كل شئ لازمله قيود
مع ان ربنا خلقنا للحرية عبيد

شعب متلبس....
فى حالة استغلال قلب وحيد
مبيعرفش يقسى.....
مع سبق الاصرار و الترصد
الحالة كلها....
مع سبق الاصرار و الترصد

تفتكروا الناس ديه من كوكبنا ولا....؟
أزياء وشوشهم بتقول غير كده!!

يافطة ممنوع التدخين....
طب و الدخان ده تفتكروا جاى منين؟؟
قالولى...آثار حريق...راح فيه مجتمع
..كان فى يوم برضه أصيل

تفتكروا يعملوا ايه اللى زينا؟
فى حضن بلد بتغربهم فى اليوم
ألف و ألف من السنين
و احنا فيها لاممنا ايه غير حلمنا؟
يفرشلنا قطرة ندى...
فى وسط عادم سيارات!
بيعدم أى شئ جديد.....
أزمة مرور ديه و لا سواقين!

انسان جوانا حزين
بس عزيمته
بتتحدى السنين
و الناس اللى عدوا فى حياتنا
مهما كانوا فى يوم غاليين
الزمن ماعدش يسمح يعملهم تماثيل
و صورهم على حيطان القلوب
لا شئ غير سراب
بندارى فيه فى قلوبنا
شقوق الجراح
وجع اللى راح
و لا عمره اللى راح راح يعود
و لازم يكون اللى فارق مش فارق
و اللى اشترى ابقى من اللى باع
و اللى اشتري من الاصلى صعب فى يوم يبيع
مع ان البلد فى الغالبية اصبحت بياعين!!

و القلعة واقفة شامخة
زينا بتتحدى السنين
بتقولنا أنا برضه كنت فى يوم
حلم....أكيد؟
حلمكم مش مستحيل

روح الحلم

رسالة راحت..رسالة جَت
بكلمة أحس.. بكلمة أقول
احساسى صدقى..ماقولش غيره
من وحى ألمى..فى وحى قلمى
ساكت و لكن..فى سكاتى سكنى

رسالة راحت..رسالة جَت
عُمر يعدى ما بين رسالات
اشارات..علامات..
لقلب حَب..لقلب داب
لقلب يرحم..
لقلب سامح ياما حاجات
لقلب سائل بصفحة بيضه
داير يدور عالاجابات

قهوة سادة..مزاج زيادة
قهوة بلدى من عم وطنى
أهو كله بلدى من نبع وطنى
عيون تغازل..عيون بتحكى
عيون بتروى شوق السنين
صوت السكون...مسك الختام
و أنا قلبى دق..

جناح يرفرف...جناح يطير
جناح يطوف..
جناح ينور ويا النجوم
قلب السما أزرق سماوى
أخضر نبات...
عود البنفسج جوا السحاب
قوس و قَزح....مالشمس طل
للحب هل...للجرح راحة
للحزن راح
و أنا قلبى دق...للحلم رق
للفرح نور
و أنا عمرى ضحكة
على وش قلبى
حياتى غنوة
ساعات حزينة...ساعات رزينة
ساعات فرايحى..على قد فرحى
بكل حتة فيكى يا بلدى

رسالة راحت..رسالة جات
رسالتى حبى..رسالتى بلدى
هنبنى فيها للى جاى منها
بطفل يجرى فاتح ايديه
لأحضانا لما تكون له بيت
و ده حلم مين ده و لا مين؟
ده حلم فيه انسان أكيد
بيبنوا بيت...بنبنى روح
روح الحلم

و الرزق لك..النية لك
و الملك لك..يا ربي لك
خد بايدى...و افرشلى نور
اجعلى نورمن جوا روحى
تنور طريقى
اهدينى ليك...فى طريق رضاك
رسالتى لك..ياربى لك

سرقة علنى

على أسفلت مكسر ماشيه
و الناس ليه عايشه فى الضلمه؟

سألت! قالولى
أصل النور بقى غالى
محدش قادر على تمنه
من كتر حقيقته ماهى غايبه

والحقيقه راحت فين
وسط زحام الغربه؟

دوامه و لا نوه؟
طاحونه و بتطحن فينا
و بحر أمواجه طايشه

و الحقيقه غارقه
جوا كدبه خاينه

و العزيمه دايبه تايهه
و الناس نفسها راح

و الصبر فاض و طق
و سلم نمرته عالكوبرى
و اعتزل المهنه بجد

و الخيانه علنى فى المزاد
و الذهول على كل وش ساد

طول مافينا بيوت فقيره
طول ما الغنى برضه فقير

و طول ما فينا قلوب جريحه
طول ما لسه قلوب هتنزف

و طول ما طبع القسوه فينا
ماحدش فينا طالعله شمس

طول ما خايفين من المواجهة
مفيش امل و لا فيه شئ أهم

وطول مالضماير طالعه رحله
طول مالضلام محتل المكان

و طول مالنور علينا غالى
مفيش ولا خطوه
للأمام

حد فاهم!!

بعد عودتى من لندن و بعد غربة تلات سنين و شوية.....و كانت "بلدى وحشتنى"...كتبت فى ليلة وصولى!!!

و فى أول نزوله الى شوارع مصرنا الجميله...كان الاستقبال الحافل....

حد فاهم؟**

شبايك منوره عالبيوت السهرانه
طرق مكشرة و مكرمشة
عربياتها دايخة
زى ناسك يا بلدى الحيارى
و الحزن مالعيون لقاله بيت
من كل رسم و كسم و لون لقيت
وشوش وسط الزحام تايهه
ايدين متشبكين على ضفة نيل
كانت فى يوم رايقة

أصوات رغم انكسارها
بتدوب و تعلى
أفكار سكوتها مسموعة
فى سجنها العالى

أحضان أبوابها مفتوحه
و مش لاقيه زوار
وأحضان أبوابها مقفوله
و عليها الطوابير بالزار

سلامات..أشواق..رنات
رغم الزحام
وحيده أنا
حقيقتى رافضه تقابل أحلامى
زيك شعبك يا بلدى
اللى عايش عالافتراضى

وكلنا بندور فى ساقيه
مليانة..فاضية..بس دايرة
و الكل هدفه يوصل
لحالة حب لا نهائى
كائن الحب الغريب
كائن عجيب
معادله حلها من سر السؤال
و الاجابة فى القلوب..غير مباح

ناس تحبك و متفهمش حبها
و ناس تحبك و متستطعمش حبها
و ناس تحبك و تتنكر لحبها
و ناس تحبك و انت تحبهم

ساعات أقول الوحده مصيرى
و أتصاحب عليها كأعز صديق
و كل ما نوصل لشط الأمان
من غدر الانسان و المكان و الزمان
يجى غدر الدنيا يهد تانى فى الحيطان

حد فينا فاهم المعادله؟
و لا حد عارف فين الحقيقه؟
الخاينه...الغريقه
حد فينا بيسهر بناجى الليالى
و عقله يصبح نجم شارد
حد فينا بيسامر القمر
طب حد فينا وصل....
حد فاهم؟

محطة وصول جيل

محطة وصول جيل**

بندورعلى يوم وصول
فى محطه فيها أمل

بندور على حبة نور
فى وسط ضلمه مكسره

بندورعلى لحظة حب
فيها صدق و صفا

بنسأل نقول ايه اللى جابنا هنا
اخترنا صح و لا غلط

جيل صحى لقى نفسه
وسط حطام المعركة
أطلال نبكى عليها
و فتات ذكريات
يوم عشناها فى عمرنا

عنوسه و نسب طلاق
و لا قدرة على فتح بيوت
و لا حتى مواصلة لحياه

و الفقر نازله أوكازيون
والحياه عقده فى منشار
و طاحونه وبتطحن فينا
و دايره و بتلف على الفاضى

رغيف العيش بقى أزمه
و الجنيه المصرى مالوش لزمه
و الزحمه تهد عزايم
و التعليم بيقول الجهل أنضف
و حتى اللحمه كلابى
ولا عاد ليها مواسم
و لا عاد لها أعياد

فساد من كل الأنواع
و كساد على أعلى المستويات

و حتى القطن و حتى القمح
بقوا بيجولنا من بره

التلوث بقى سيمة العصر
و الميه بقت مسمومه فى مصر
و فلوسنا قلت فى البركه
و المواطن و حقوقه
على طول نازلين فى القيمه

و الحرب بقت اعلام
بيحطم كل قيمنا

و بقت أمريكا العظمى
بتصرف على كل بلدنا

و الصين بتصدرلنا فول
و ناقص هتصدر شعبك

و حتى طيور الحريه
مريضه و بعفيه شويه

أصبحنا جيل زعلان
وأصبح معنى الانسان
فينا مهزوم ميت مره

طب بصوا على أشعارنا
و لا حتى على كتابنا
هتلاقوا نبره حزينه
طالعه من جوا قلوبهم
فايره فى كل كلامهم
سواء عالجوها بايجابيه
أو بمراره فى السخريه

واحد فينا عايشها و بس
وواحد تانى بتكسر فيه
وواحده بتحاول تغالبها
و كتير انحلوا من الغلب

لا فينا زغلول و لا مصطفى كامل
و لا طلعت حرب و لا قوميه
و لا ناصر يا حريه
ولا أى شئ بيقول وطنيه

و البطل فينا كل ما بيحاول
بيصبح فينا مفقود
بيصبح فينا غايب

طب هنسيب ايه للجايين
و سابولنا ايه الرايحين
و ايه أخبار الحاليين
أرجوكم لا تعليق

يمكن بكره هنتحسن
يمكن بكره هنتقدم
طب بكره ده راح فين
و تفتكروا هيجى منين

وأكيد فى يوم راح نوصل
وأكيد فى يوم هتعلى
قالولى الأمل مات
قلتلهم عمره ما بيموت
طول ما احنا فيها عايشين

محطة وصول جيل

بندورعلى يوم وصول
فى محطه فيها أمل

بندور على حبة نور
فى وسط ضلمه مكسره

بندورعلى لحظة حب
فيها صدق و صفا

بنسأل نقول ايه اللى جابنا هنا
اخترنا صح و لا غلط

جيل صحى لقى نفسه
وسط حطام المعركة
أطلال نبكى عليها
و فتات ذكريات
يوم عشناها فى عمرنا

عنوسه و نسب طلاق
و لا قدرة على فتح بيوت
و لا حتى مواصلة لحياه

و الفقر نازله أوكازيون
والحياه عقده فى منشار
و طاحونه وبتطحن فينا
و دايره و بتلف على الفاضى

رغيف العيش بقى أزمه
و الجنيه المصرى مالوش لزمه
و الزحمه تهد عزايم
و التعليم بيقول الجهل أنضف
و حتى اللحمه كلابى
ولا عاد ليها مواسم
و لا عاد لها أعياد

فساد من كل الأنواع
و كساد على أعلى المستويات

و حتى القطن و حتى القمح
بقوا بيجولنا من بره

التلوث بقى سيمة العصر
و الميه بقت مسمومه فى مصر
و فلوسنا قلت فى البركه
و المواطن و حقوقه
على طول نازلين فى القيمه

و الحرب بقت اعلام
بيحطم كل قيمنا

و بقت أمريكا العظمى
بتصرف على كل بلدنا

و الصين بتصدرلنا فول
و ناقص هتصدر شعبك

و حتى طيور الحريه
مريضه و بعفيه شويه

أصبحنا جيل زعلان
وأصبح معنى الانسان
فينا مهزوم ميت مره

طب بصوا على أشعارنا
و لا حتى على كتابنا
هتلاقوا نبره حزينه
طالعه من جوا قلوبهم
فايره فى كل كلامهم
سواء عالجوها بايجابيه
أو بمراره فى السخريه

واحد فينا عايشها و بس
وواحد تانى بتكسر فيه
وواحده بتحاول تغالبها
و كتير انحلوا من الغلب

لا فينا زغلول و لا مصطفى كامل
و لا طلعت حرب و لا قوميه
و لا ناصر يا حريه
ولا أى شئ بيقول وطنيه

و البطل فينا كل ما بيحاول
بيصبح فينا مفقود
بيصبح فينا غايب

طب هنسيب ايه للجايين
و سابولنا ايه الرايحين
و ايه أخبار الحاليين
أرجوكم لا تعليق

يمكن بكره هنتحسن
يمكن بكره هنتقدم
طب بكره ده راح فين
و تفتكروا هيجى منين

وأكيد فى يوم راح نوصل
وأكيد فى يوم هتعلى
قالولى الأمل مات
قلتلهم عمره ما بيموت
طول ما احنا فيها عايشين